كان غصب عني لما قررت البعاد….قصيده للشاعره ناديه مدين

كان غصب عني لما قررت البعاد
و دا حكم عقلي مش جنون ولا كان عناد
كان خوف عليك من كل شيء يا حتة منّي
علشان حياتك كان ضميري بيحاصرني
شايفاك في بيتك قصر حواليك الولاد
إزاي أفرّق بين حبيبي وبين عيونه
لازم وحتمًا اللي بيحبك أصونه
و احميه بقلبي مش ممكن أخونه
علشان حياتك قررت البعاد
وانا قلبي يصرخ زي طفل في يوم ميلاد
خدوه من أمه حرموه الحنان
هفضل أحبك لو مر الزمان
و اخفي دموعي وارسم في ابتسام
علشان تصدق إني مش حاسة الآلام
ف البعد عنك رسمة لك طريق
هيكون نجاتك وهاكون الغريق
أنا مش مهم إني أعيش حتى الحياة
لكن فراقي هيكونلك نجاة
و تعيش حياتك ويّا بيتك
ومعاك الولاد
علشان حبايبك اخترت البعاد
ودا غصب عني مش جنون ولا كان عناد