الأربعاء , ديسمبر 2 2020

الست المفروسة أوى:…..قصيده للشاعر راضي علي الطهطاوي

الست المفروسة أوى:
وبتسأل أنا ليه زعلانه
باين على وشى ودبلانه
من تعبى معاكم ف البيت
على لقمة بالملح وزيت
وحماتى الست النكدية
م الدنيا بتطلب تمحينى

وشقاوة عيالك والزيطه
عفاريت بتنطنط ع الحيطه
ومشاكل مع كل الجيرة
وسايبنى فى النار والحيرة
وعايزنى رايقه وأغنى
وعيالنا تعزف تلحينى
=
مش فاضى لابنك ولا بت
ويادوبك قاعد ع النت
وف بيتك أنا شايله الويل
وبتسهر على أخر الليل
وتقول أنا عايز أتعشى
وبكل غلاسه تصحينى
=
كرشك قدامك بيمد
شيشه وسجاير وتشد
وف وشى دايما ًبتكشر
وتعاكس الست الْ بتنشر
وعامللى روميو وحبوب
وسايبنى تايهه ف طواحينى
=
وبتعمل ناسى ومش فاكر
ولا ليله مع ابنك بتذاكر
بتنام وتسهر على كيفك
وكتير بتبذر مصاريفك
وعاملنى يا دوبك خدامه
عن كل مشورة تنحينى
=
مطبخ وغسيلك والمكوى
ولا عمرك حسيت بالشكوى
وبايدك مامسحتش أوضه
وتقول مش لابسه ليه موضه
أنا عايز وحده تكون مُزة
تفهمنى ف وقتى وف حينى
=
بتأزأز لب تاكل بندق
وف بيتك عايزه يادوب فندق
قاعد وبتشخط تتأمر
تطلب ف المحشى ومتحمر
وبتسأل مالك مهدوده
ياحبيبتى قولى وصارحينى
=
ومدلع نفسك ع الأخر
وبتلبس سوبر كدا فاخر
ولاجبت بلوزه تفرَّحنى
وكمان بزيادة تجرَّحنى
وتقوللى دولابك مليان
غلطانة وامتى تصالحينى
=
مع ست غريبه بتتبسِّم
وكلامك حلو ومتقسِّم
لو قلنا نخرج نتفسح
تعمل عيان ومتكسح
وبتطلع لينا بأعذارك
وتقول يا حبيبتى سامحينى

 
 
 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: