الخميس , ديسمبر 3 2020

عودة ستوته اللتاتة (ستوته والتكنولوجيا ) .. قصة قصيرة لـ مي شريف

عاد سى محفوظ متأخرا هذه الليلة من عمله وكانت ستوته كعادتها فى انتظاره ولكنها فى هذه الليله كانت فى حاله شديدة من الغيظ فتح محفوظ الباب بهدوووء شديد فإذا بستوته تصرخ فى وجهه اهلاً اهلاً انت شرفت يا سى محفوظ افندى ما لسه بادرى ولا اقولك ما كنت تبات بره احسن صحيح ما انا الجارية اللى اشتروهالك من السوق ما تنطق قبل ما افتح نافوخك كنت فين كل ده وازاى ما تكلمنيش وتقولى انك هتتأخر انطق يا راجل ساكت ليه بدل ما اصوت والم عليك الجيران ما كلمتنيش ليه فى التليفون بدل ما انا عماله اضرب اخماس فى اسداس فرد محفوظ قائلا يا وليه اهمدى وبطلى موشح كل ليلة ده انت ما بتهمديش ابداً اتأخرت ايه وبتاع ايه ما تبصى فى الساعه اللى متعلقه على الحيط يا ست الناصحين – بص انت يا ناصح اهوه الساعه واحده بعد نص الليل ولا مانتش شايف اشق هدومى منك يا ستوته واحدة ايه دى الساعه عشره ونص يعنى يا دوب خلصت الورديه وجيت حتى بصى الموبايل بتاعى اهوه مش هيكدب فى الساعه كمان – يا لهوى يا محفوظ ده صحيح دا باين الساعه خربت ولا ايه اقولك يا محفوظ ولو انى ما بحبش الحاجات دى هاتلى موبايل يا محفوظ واهو على الاقل لو اتأخرت اكلمك اطمن عليك وما تزعلش منى يا محفوظتى اجيب لك العشا بقى – ربنا يهديكى يا ستوته يا مطلعه عينى ههههههه انا عارفه على قلبك زى العسل ولا ايه – وانا اقدر افتح بؤى يا ستوته -ها بقى هتجيب لى الموبايل امته بكره وانا راجع من الشغل هيكون فى ايدى ما تخافش – تسلم لى يا محفوظ بس على شرط اياك تسترخص عايزه واحد حلو كده من اللى البت سنيه بتقول عليه تاتش ويكون فى فيس بوك وواتس اب وشويه جاجات كده فصرخ محفوظ فى وش ستوته نعم يا اختى وانتى عرفتى الحاجات دى منين يا ست ستوته دا انتى لو خرجتى على اول الشارع تقولى يا غربتى ههههههههههه من التليفزيون يا محفوظتى والبت سنيه كان قاعده معايا وهى اللى فطمتنى على الحكايه دى ماشى يا اختى اما نشوف اخرتها – وفى اليوم التالى عاد محفوظ ومعه الموبايل الجديد للست ستوته وبدأ ستوته سلسلة الاسئله محفوظ …. نعم يا ستوته شغلى الموبايل …حاضر الا قولى يا محفوظ الزراير دى بتاعة ايه -محفوظ ….نعم يا ستوته هو انا لو عايزه ارن عليك اعمل ايه طيب لو عايزه ابعت لك رساله طيب لو عايزه اكلم البت لوزه ومحفوظ يجيب على كل سؤال ويعيد ويزيد فى الشرح محفوظ اعملى نغمة حرمت احبك وهنا شاط محفوظ حرمت ايه يا اختى يوووه عليك يا محفوظ مش باظبط الموبايل وسهرت ستوته طول الليل تظبط فى التليفون الى ان نام محفوظ وهو يجيب على اسئله ستوته حتى صرخت ستوته فجأه يا دهوتىىىىىىىىى استيقظ محفوظ من نومه مفزوعا فى ايه ياللى تتشكى فى قلبك هتموتنى مالك انا قلت القيامه جت الحقنى يا محفوظ جيت ارن على رقمك مسحت كل اللى فضلت اعمله طول الليل يا عينى عليكى يا ستوته وعلى بختك المنيل وهنا صرخ محفوظ انت هتنامى وتتخمدى ولا اخرج واسيب لك البيت دلوقت -يا لهوىىى يا محفوظ انت عايز الناس تاكل وشى ولا ايه خلاص هسكت اهوه والصباح رباح وابقى اخلى البت سنيه تعلمنى تعرف يا محفوظ دى اررروبه هى والبت جملات بنت سيده بتاعة العيش ولا البت تفيده يوووه هو انا ما قلتلاكش عن البت شربات مش جالها عريس بس هى مش راضيه وامها ولم تكمل ستوته جملتها الا ومحفوظ يرتدى ملابسه ويخرج من الغرفه انا نازل الشارع يا لهوى دلوقتى يا محفوظ ؟؟؟!!! طيبخلاص هسكت خالص وحرمت اجيب فى سيرة الناس ودع الخلق للخالق .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: