أزمة أخلاق .. بقلم : ولاء فريد الشامي

اتربينا قوي ..اتربينا لدرجة أن احنا مش عارفين نعيش !!
ما اتعلمناش اللف ولا الدوران ولا الملاوعة ولا المظهره الكدابه ولا التزييف .. اتعلمنا الكلمة الواحدة و الصدق و الأمانة والوعود الصادقه !!
اتعلمنا نراعي ربنا قبل اي حد ، ما نعرفش نقول كلمة و نعمل عكسها ونخذل حد ونبخر وعود .. من كتر ما اتربينا بقينا نصدق كل حاجة ، و ما بنشوفش اي حاجة وحشة في حد . اي حد ممكن بكلمتين حلوين ممكن نصدقه، و بعدين نكتشف حقيقته المرة ..يا ما اتخدعنا لاننا شايفين كل الناس نقية .. عمرنا ما صدقنا أن فيه كدابين و نصابين و اندال .. بنعامل الكل علي نياتنا البيضا !!
من كتر ما عشنا الأخلاق ما بنصدقش أن فيه ناس ما عندهاش ريحة الأخلاق ولا تربت علي الاصول !!
و علشان كده يا ما اتصدمنا كتير !!
ما بقناش عارفين نعيش وسط الناس .. عاوزين ملايكة نعيش معاهم !! بس برضه موافقين ..
موافقين لاننا مش هنعرف نغش و نلف و ندور و نشتم و نخاصم و نهاجم و نحقد ونكره الخير و نتخانق .. مش هنعرف نكون غير كده ، نحب و نسامح و نقدم الخير للكل !!
اللي مطمنا قوي أن لينا رب كريم وحنين و مضلل علينا ، بيلاقيلنا حل و مخرج في كل ضيقه، بيواجه عنا اللي مضايقنا وتعبنا وبيعوضنا عن اللي خسرناه بسبب حسن نوايانا !!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.