الأربعاء , نوفمبر 25 2020
أخبار عاجلة

ما تيجي نتفق نبعد….قصيده للشاعر أحمد الخدرجي

ما تيجي نتفق نبعد
ثواني يا بت مش قصدي
أنا قصدي حنبعد شهر و لَّا اتنين
نشوف فيهم بقينا ازاي
حنبقى مرتاحين مثلا ؟
حنقدر ننسى فيهم بعض ؟
حنستسلم ؟
حنتجنن ؟
كدا يعني
تعالي نتفق نبعد
ما نقراش أي حاجه لبعض
و لا نعلق ف بوست لبعض
و لا نعمل لايك حتى
و لا نكلمنا ف التليفون
و لا ع الخاص
نشوف مين فينا حيعيش الحياه عادي
و مين فينا حتتعور تفاصيلُه و تنزف دم
و مين يقدر
و مين ماقدرش
نشوف مين فينا حيكمل ف طيرانُه
و مين فينا حيستسلم أوام للأرض
و مين روحه حتستنجد بروح التاني أحياناً
عشان ينهي الوجع فينا
بقالنا كتير بنتخانق
و نزعل مننا جدا
و نتنرفز
و نتعفرت
بقالنا كتير بنستعبط
و بنعيط
و بنـ ……….
– نعم يا ختي
دموعك جاهزه من دلوقت ؟
عياط من اول السكه
بيسرق منك الضحكه و يرميها من الشباك ؟
خلاص طيب
مفيش حاجه
لغيت الفكره يا حبيبتي
انا محتاج اوي لحضنك
و لسه لحضني محتاجه

 
 
 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: