السبت , يناير 23 2021

سحابة صيف وهتعدي ….قصيده للشاعر أحمد طليس

سحابة صيف وهتعدي 

مداد عايش فوق السطور يدمي 

ورافض تكون كل الحروف خرسا 

برغم ان نبضاتي من حلاوة روح 

ساعات الهمسة ع الشفة 

من كتر العطش بتبوح 
وتكشف قلب عاش مجروح 
ومتحنط ف جوه تابوت 
رنين لغياب وصداه الصوت 
يزلزل سهد ليل مدبوح 
ماعاد الحلم جوايا يكون مسموح 
دا متقيد علي غصن الشجر ف خريف 
سحابة صيف وهتعدي 
برغم أن محرابي ماعاد له وصيف 
وحارس معبدي المسحور 
مارد م الجان 
بيعزف م الألم ألحان 
لزوم تشريف 
ما عاد يقدر ف غمضة عين 
يطير يرجع مع بلقيس 
يجيب لي عرشها الدهبي 
ولا الهدهد يتمتم لية بالأخبار 
 ولا بستاني ف غيابها 
راح يطرح زهور نوار 
وعاش الشوق ف جوايا نديم محتار 
ما عاد يغفر زلاتي ف نور أو نار 
يا آخر حلمنا مشوار ما كان له وداع 
ياموجة بحر جاياني تهز قلاع 
عشان تغرق مركبي الورقي بكل شراع 
ياليل أنقش لي هالات علي الحيط 
مابين الضلمة والعتمة بلاها بيبان 
يانبضي اللي حس إنه كما المولود 
ماتتكلم كما عيسي لما كان ف المهد 
وأنبش جوه قلبي وجدرانه ف وجدانه 
وانحت لي تمثال ف جوايا 
ولو حتي يكون م الشمع 
عشان يسهر مع دموعي مع دموعه 
علي الرملة ف قصور للوعد 
ياحرف لورد متعطر من الذكري من امبارح 
دا فوق السطر م الأول حنين سارح 
ياليل مسافاتي ماتسامح ف دي غربة 
وانده للصدي مرات ف سراب الدرب 
يادوب يرتد كما الكوابيس 
ويتحول لحلم كابوس 
وتسمع جوه في عصاتك زنين السوس 
وتتكسر .. ماعاد طولك صالب طولك 
وقعت إنت فيك جواك بتتكسر 
سامع صوتك بتتكسر 
سامع نبضك ومتحسر 
برغم الدمع متحجر 
بيجري الهمس يوصف لك علي سطورك 
عليك يفتن من حاجات جواك ……….
ياريت قول لي 
إيه اللي باقي مني معاك …؟؟؟
برغم إني انا كلي ….
لسه معاك …!!!!!!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: