أولاد_عابد.. الدراما المعلولة.

كتب :خالد عاشور
من الحلقة الأولى ظهرت بشائر مسلسل أولاد عابد.. ورغم ان المسلسل مقتبس من المسرحية العظيمة “الملك لير” للكاتب العظيم شكسبير.. الأقتباس في حد ذاته لا يعيب اي اعمل.. ولكن كتابة السيناريو تحتاج لكاتب لديه رؤية مهندس في بناء الشخصيات والأحداث.. ويبدو أن منصة شاهد كمنتج اصابتها عدوى المتحدة للخدمات الأعلامية في مصر وان المسئولين على تقييم السيناريوهات والأخراج لا يختلفون في طريقتهم عن المتحدة.. طيب الموضوع عندنا بتحكمه المجاملات والتدجين والشللية وان المسئول لازم يكون بيسمع الكلام ومعندهوش قدرة على الأبتكار او النهوض بالدراما.. المهم انه يقدم كل ما هو هايف أو ما يقدم من شلته ومجموعة من معدومي الموهبة متحكمين في الدراما لدينا في مصر.. السؤال هل ده مسلسل يحتوي على اي فكرة جديدة.. فكرة الصراع العائلي والجشع تم تقديمها بأكثر من شكل منذ بدايتها على يد شكسبير في الملك لير.. قدمها عبد الرحيم كمال مرتين الأولى في مسلسل “دهشة” والثانية في مسلسل “الرحايا حجر القلوب” .. عبد الرحيم كمال اقتبسه بسلاسة وحرفية في بداياته.. لكن في مسلسل أولاد عابد الأقتباس سيئ.. ومهما انكرت مؤلفة السيناريو اقتباسها من “الملك لير” فان الحكاية تفسر الأقتباس “المعلول” كما تقول الممثلة انتصار وتكرر في كل حلقة كلمتها الغريبة “المعلول”.
أما على مستوي الأخراج فهو للاسف أقل من المتوقع ويصل الى درجة السيئ.. وعن التمثيل فحدث ولا حرج لأن اسوأ ما يحدث من الممثل بالنسبة لي ان اراه يمثل دون ان يتقمص ويتعايش مع الشخصية.. كله بيمثل.. كله “Fake” بداية من الفنان رياض الخولي الذي لم يأت بجديد مع احترامي الكامل لفنه ومسيرته.. أما عن “الممثلة” وأقول الممثلة لأنه فرق كبير بين الممثلة والفنانة.. الفنان المبتكر اللي بيغير من جلده.. من طريقته.. بيعيش الدور مش بيحفظه ويزعق.. أول ملاحظه بنقولها لطلبة المسرح والتمثيل لو انت ضعيف ومش عارف تطلع احساسك بالشخصية فرد فعلك بيكون انك بتزعق أو باقولها لطلبة التمثيل “لما ما تعرفش تعبر.. هاتجعر” علشان تدراي ديفوهاتك.. وده للاسف بينفع مرة.. مرتين .. لكن يتحول لاسلوب حياة كده الفنان بيموت نفسه بنفسه.. أما الأسوأ من ناحية التمثيل فهي “برضه” الممثلة انتصار.. الشر والكراهية مش لازم علشان تعبر عنها تكون شخصية ” vulgar” مبتذل وبتجعر وبتشرشح علشان تبين انك جشع واناني ومادي.. اسلوب الفنانة انتصار للاسف هو الأسوأ بين الجميع مع احترامي لها وتقديري بالطبع.. لكن الأمانة النقدية تستوجب التنبيه.. وبعدين لزمة “معلولة” دي مضحكة بجد.. واذا كان الكل واضح جدا انه بيمثل بدون المعايشة الحقيقية للشخصيات وبعيد عن الأقتباس والسيناريو المترهل والمتهالك والممطوط حد الأرتخاء السردري.. فيأتي بعدها مصيبة النطق والحوار واخطاءه التي سأذكر منها بعض الأخطاء.. في الحلقة الأولى الممثل “محسن محيي الدين بيقول جملة ” الكل عمال يغرف في خير ابونا كأنها فتة محلولة” يا استاذ محسن.. فتة غير “قتة” أو هانقولها باللهجة القاهرية “آتة محلولة” لكن الدمج والسرعة في نطق الحوار راحت بالحوار في سكة تانية “فتة محلولة” غير “آته محلولة” .. المثل اصله “بتاكل في قتة محلولة” مش فتة محلولة.. ولو عندك مشكلة في مخارج الحروف والمخرج ومساعد المخرج والمونتير ما اخدوش بالهم تبقى مشكلة.. مع احترامي لشخصك استاذ محسن محيي الدين.. في الحلقة الثالثة يقول الفنان “محمد رضوان” شيطان ودخل فيكم يا ولاد عابد…!!!!” والصح.. شيطان دخل بينكم.. مع حبي وتقديري للفنان الجميل محمد رضوان اللي يمكن هو الوحيد اللي بيمثل في الحكاية كلها .. مع ان الدور مكرر .. لكنه من ناحية التعايش بيتعايش مع الشخصية.
نرجع تاني للسيناريو والأخراج.. في السيناريو ايتن عامر واحد بيصور لها فيديوهات “حميمية” وبيبتذها.. موضوع وبيحصل كل يوم.. تروح له البيت بعد ما بيبتذها وبدال ما تاخد الكمبيوتر بتاعه والموبايل وتجري وهو مغمي عليه بعد ما ضربته على دماغة في مشهد كوميدي من الناحية التمثيلية.. وبغض النظر عن ان اغلب مشاهد ايتن عامر كلها جعير وتمثيل ” vulgar” لكن السيناريو يخليها تكسر الكمبيوتر بالطريقة دي.. طيب ما الكمبيوتر اتكسر.. لكن الهارد سليم وهايرجع الحاجة.. ولما تحذفي الداتا من على الأيفون كده هو مش هايعرف يرجعها.. كان الأفضل تاخدي الموبايل والكمبيوتر وتجري بيهم وتحرقيهم .. طيب ايه رأيك لو كان معاه فلاشة مستخبية عليها الفيديوهات او رافعها على الأنترنت.. كده اتحلت من وجهة نظر السيناريست.. شوية عقل ودراسة للواقع.. ده لو عيل في ثانوي هايكون اذكي من كده… ثم في شخصية الحفيد الحشاش.. مش ابداع ولا اسقاط سميولوجي انك تحط صورة “بوب مارلي” علشان تعبر عن الشخصية.. ده اسقاط كبير قوي بعيد عن شخصية تافهه زي شخصية الحفيد الحشاش.. هو انت كده بتضيف عمق للشخصية يعني؟!.. حتى في مشهد الحلقة السادسة واللي جمع بين “ايهاب فهمي وأخت صديقه في بيتهم الممثلة “تاتيانا” .. مش معقول واحدة تشرب 6 زجاجات بيرة وجوان حشيش وتفضل بالثبات الأنفعالي ده.. ده لو بتحشش وتشرب بيرة وهي طفلة رضيعه هايأثر فيها.. عجبا لكم ايها المصريون.. تشربون 6 بيرة وجوان حشيش ولا يظهر عليكم اي علامات للسطلان.
نيجي للشخصية اللي بيقوم بها الممثل ” ايهاب فهمي” .. هو انت كده لما تقعد على زهرة البستان أو افتر ايت او تروح قهاوي وسط البلد بقيت مثقف.. يبدو ان صورة المثقف عند السيناريست والمخرج قديمة قوي.. نيجي لشخصية المتسول “عنابي” ايه الشفافية دي اللي عند المتسول .. ده ولي من اولياء الله الصالحين او قديس علشان يتكشف له الغيب.. ثم انها تناص مع شخصية المهرج في مسرحية الملك لير ونرجع نقول باستعارة جملة “عبد الملك زرزور” من فيلم “ابراهيم الأبيض”.. الأقتباس حلو مفيش كلام” لكن الغشومية بتخلي الكتابة رديئة.. مسلسل اولاد عابد مسلسل من الناحية الدرامية والسيناريو عبارة عن مسلسل “Fake”.. من الحلقة الأولى حتى الحلقة السادسة.. ومهما ما تقولوا انه متصدر التريند والأعلى مشاهدة فده موضوع معروف وشاركت لأكثر من مرة في حوارات صحفية عن خدعة “الأعلى مشاهدة والتريند” لأنها أول خطوات البروباجندا لأي عمل ضعيف و””Fake”.

شاهد أيضاً

كنانة حاتم عيسى ورؤية… موجزة في المجموعة القصصية  (الزائر) لـ أسيمة إبراهيم

كنانة حاتم عيسى ورؤية… موجزة في المجموعة القصصية  (الزائر) لـ أسيمة إبراهيم   لطالما تميز …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: