جريدة العربى اليوم الاخبارية
——‐—————
في ليلة صيفية واثناء عودتي للبيت توقف محور المشير لمدة ساعة كاملة لا حركة ولا بركة والناس بدأت تغادر سياراتها لتستطلع الأمر..وعندما وصلت الي مواجهة مسرح المنارة وعينيك ماتشوف الا النور..آلاف من شباب صغير ١٦ و١٧ سنة خارج من المسرح بعد حفلة شاب مثلهم اسمه ويجيز ..سألت :ويجيز مين ؟
قالولي ازاي ماتعرفيش ويجيز ؟وعرفته وسألت بناتي عليه وضحكوا من عدم معرفتي وحكوا لي كتير ..وعرفت لأول مرة ( يا لحمة نية ..مابستويش . والشغل شغل ..الحق صنعة ..والعين بالعين والدية طلقة ..شمال افارقة والحركة بركة ..وشك دواسة ..ادوس تكركر كركر ..كركر .)
دا كلام اغاني ويجيز مش كلام عمل سفلي لازم له شيخ ببخور ولا حاجة .
ايه اللي فكرني بويجيز ؟
ماكتبه الزميل علاء الغطريفي وماحكاه الفنان سيد هويدي عن طوابير الشباب الصغير في معرض الكتاب للحصول علي توقيع يوتيوبر اسمه محمد طاهر بيعمل ريفيو عن افلام ومسلسلات بخفة وتريقة في كتاب اسمه (فيلم في الخمسينة) وكمان ملخصات كرتونية لروايات زي راوية ( الايام) لعميد الأدب العربي بعنوان القطة المشمشية. ماشية ع النعناعية)
وطوابير عن كتب رعب ليوتيبوبر اسمه يحيي عزام ومحمد عصمت .
طوابير ..طوابير شباب صغير ربما لا يعرف من هو طه حسين وغيره .
طيب دول مين ؟دول ولادنا الصغار ..اللي بيتكلموا عربي مكسر ..وبيكتبوا العربي بحروف مش عربي .. واحنا مانعرفش حاجة عنهم ومش واخدين بالنا منهم واحنا بقايا الجيل اللي قوم الدنيا علي عدوية وانهيار الفن لما بس قال سلامتها ام حسن . اسفين يا عدوية !
مقدرش ألوم ولا اسخر من ولادنا دول بتوع ويجيز ..لأننا كاافراد وقوة من اللي بيقولوا عليها ناعمة ومؤسسات دولة ببناياتها وموظفيها وفلوسها لم نقدم لهم فن ولا ثقافة ولا ذوق ولا فكرة
بالعكس ولادنا لم يروا الا مفاهيم منحطة ورخيصة لكل ماهو يجب الحفاظ عليه من معمار وتراث وتاريخ وأثر وأرض وبشر ابدعوا وقدموا فنون وثقافات وكتابات بعمرهم كله ..لم يراكموا ثروات قدر ما راكموا اسماء وعلامات واضافات في بلد كانت تصنع وتبني وتزرع وتمد يد العون وتقاوم كل معاني التخلف والرجعية والرخص . الحكاية معقدة وملعبكة اوي وعايزة ارادة ورؤية وبوصلة وعايزة ناس ..ومنين نجيب ناس .؟؟؟؟؟
