الأحد , سبتمبر 27 2020

احمد عفيفي يكتب : تخاريف صايمين!

 • مسلسل ” اللهم اني صايم ” من اسوأ المسلسلات الرمضانية هذا العام ، فمصطفى شعبان عايز يفرض نفسه فرضا على المشاهد كبطل أوحد ، لكنه في كل مرة يفشل .. والغريب انهم بيجيبوه تاني ……. ليييييه … ؟ معرفش!
 • .. وشرحه عادل امام مع الفارق طبعا في القيمة والتاريخ .. بس عايز اقول ان عفاريت عدلي علام عمل ساذج واهبل وغبي .. كمان عادل امام واضح انه مبقاش قادر يمشي .. السن بان عليه جامد ، بس الفلوس مغرية .. انشالله تضيّع تاريخي .. اما هالة صدقي فبعد ما كنت منبهر بها في ” ونوس ” السنة اللي فاتت ، السنة دي غمت نفسي بدور عبيط ، ومتخيلة انه دور عمرها ، والحقيقة انه دور نهاية العمر!
 • بقت موضة كل رمضان .. المسلسلات تتعرض ونسمع عن القضايا المرفوعة عليها وضدها من هنا وهناك .. المضيفات غضبانين من ” أرض جو ” عشان كلمة اتقالت في ملهى ليلي اعتبرتها المضيفات كلمة أبيحة وقليلة الادب وتسىء الى شرف المهنة ، رغم ان المسلسل في إجماله وبعد مرور 10 حلقات منه بدأ بقوة وبعدين نزل على مفيش ، والممرضات غضبانين من بيومي فؤاد عشان مسلسل ” ازي الصحة ” بسبب ممرضة ” شمال ” ، فليه وليه تطلّع الممرضة ” شمال ” ، انت كده بتسىء لكل ممرضات مصر.
 يادي النيلة .. وأدي عضو مجلس شعب أد الدنيا .. قال ايه .. زعلان من مسلسل ” كلبش ” عشان مطلع عضو المجلس في العمرانية حرامي وابن كلب وبتاع 3 ورقات ، واقسم بالله العظيم انا مش كده .. كأن المسلسل بيتكلم عنه هو تحديدا ، مش مجرد عضو برلماني فاسد. 
 يعني زي مابقولكم .. موضة كل رمضان .. بس موضة غبية وبتبين أد ايه فيه كمية جهل غير معتادة عند ناس كتير جدا ، لا فاهمين ولا عارفين .. عايزين بس يظهروا في التليفزيون ويعملوا لأهلهم قصاد الكاميرا باى باى.
 • عايز اقول ان برنامج رامز جلال أعفن برنامج ممكن تشوفه في حياتك ، ومش عارف لحد امتى حنفضل نعترض ونقول ونبلغ حتى الشرطة ، وفي كل سنة حنلاقيه في وشنا كأنه عملنا الردي ، كله تمثيل في تمثيل وناس تقبض فلوس بالعبط ، وكل مايبان عليك انك مكنتش عارف المقلب كل ما تاخد اكتر .. واهو ناس بتهرج وتاخد فلوس .. وناس بتعيط من الهم اللي هما فيه.
 • تعالى بقى على كاميرا خفية تانية .. بس محترمة .. وبدل ماتضحك حتلاقي نفسك بتبكي .. من موقف انساني بيحصل في الشارع او في المحل او اى مكان ونشوف رد فعل الناس البني أدمين الحقيقيين ايه . انا بكلمكم عن برنامج اسمه ” الصدمة ” على ام بي سي مصر .. صاحب الفكرة راجل محترم والرسالة اللي عايز يوصلها أكثر احتراما.
 • دايما في معظم المسلسلات تلاقي فيه شخصيات مش قايمة بدور البطولة انما بتشد عنيك عضب عنك بأداء متميز ورفيع المستوى .. مثلا في مسلسل ” الحساب يجمع ” البنت اللي اسمها ” سماح ” الشغالة اللي سرقت الخزنة ، أداؤها اكثر من رائع ، وفي مسلسل ” كلبش ” يخطف نظرك من اول مشهد امين الشرطة زناتي لممثل اسمه دياب ، وفي الزيبق تلاقي محمد شاهين ضرب في العالي جامد في أدائه لشخصية الجاسوس.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: