الخميس , سبتمبر 24 2020

الليل معدية .. …قصيده للشاعر سعيد شكري

الليل معدية .. 
على جنة مش ليا 
ولا كنت يوم ليها .. 
أتعب وأبنيها ..
 تهدها الميه ..!!

وتهد أحلامى .. 
على شط أيامى ..
والموجة بتساند .. 
حظى اللى بيعاند .. 
 وانا عقلى مش فيا ..!!

بتبعتره الأيام .. 
تدينى راحتى بكام ..؟!!
فهمنى بالراحة .. 
ده الذنب تفاحة ..
 وشيطان وجنية ..!!

وسوس كشفهالى .. 
قلبى اللى كان خالى ..
ميل .. يغطيها .. 
إيه علقه بيها ..?!!
 وماكنش “ف” النية ..!!

يابنت من ضلعى ..
إوعى الزمن إوعى ..
لو مال .. بيستقوى ..
وبيعشق الأقوى ..
 وما عندهوش .. دية ..!!

وانا قلبى عود أخضر ..
لو شاف ربيع يقدر ..
يشب .. ويخضر ..
زى الندى .. يقدر ..
يطرح جناين ورد ..
 بالحب مروية ..!!

ويخاف اوى “م” الزيف ..
والليل .. وصهد الصيف ..
والغدر من صاحب ..
خط الزمن .. ساحب ..
زاد ع الوجع “1000” ..!!

ورق الشجر ميل .. 
والدنيا بتليل ..
وماعدش فيه باقى ..
طاب ليه بتشتاقى ..؟!!
 “ف” الرايحة والجاية ..!!

وتقربك .. نسمة ..
وبتبعدك .. قسمة ..
وانا قسمتى مايلة ..
وإيديه مش طايلة ..
 غير شوق وحنية ..!!

وكمان قيراط “م” الصبر ..
يكفى الخواطر .. جبر ..
لو “ع” الرضا .. ناوية ..
إيه اخرة الكوية ..
 يا قلوب محنية ..!!

بالدمع .. خد وكف ..
رصى القلوب “ف” الصف ..
تحصى اللى حاصل لى ..
وإتيممى .. وصلى ..
 بس إخلصى النية ..!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: