السبت , نوفمبر 28 2020

ساقيه وناى حزين….قصيده للشاعر طلعت سالم

أجمل مافيكى يابلدى ساقيه وناى حزين

الميّه نازله كأنها أجمل دموع العاشقيـــن
ياساقيه دوّبها الحنين أنا بسألك :
من كام سنه بتبكى مع الناى الحزين ؟؟؟
ياام الدموع شلّال حيـــــــــاه
ياام الدموع تسبيـــح .. صلاه
مين بس غيرى حيـــسألـــك
ويوصلّك عند القمــــــــــــــر ؟
ويغنّى للناس أغنياتك ع الوتر
ويسمّع الطير والشــــــــجر ؟
ياام الدموع عذبه وصافيه سلسبيل
تروى الغيطان تطرح جناين برتقـــان
تطرح لمون تطرح بلح أنا بســـــألك
كل الدموع دى دموع عذاب
ولّا الدموع دى دموع فرح ؟؟
ياسمره يا لابسه الطــــرح
أنا باعشقك لو قلتى إيه راح اصدقك
ياام الكلام أبيض بلون ضى النهـــــار
الزرع يضحك يشربه يصبح خضــــــار !
أعذب كلام يابلدى ممكن يتسمــــع
صوت الخرير آه يابشر لو تسمعـــــوه
حتصدقوه وحتعشقوه
ف بلدنا كان .. كان فيه هنا ساقيــه
بسأل وبحلم بالجواب يامصر ليــــــه
كل الحاجات الحلوه مش باقيـــــه ؟
الريف خلاص تاجه الجميـــــل ولّى
والناس خلاص هجرت زراعة أرض ومصلّى
أجمل ما فيكى يابلدى ساقيه وناى حزين
الساقيه دايره من ملايين السنين
يا مصر ياساقيه الحنين للمحرومين
دورى وغنّى غنوتك أن لسه باسمع كلمتك
ما أنا أصلى عاشق ضحكتك
عاشق أمير العاشقــــــــين
ياام الدموع شلال حيـــــاه
ياام الدموع تسبيح . صلاه
مااعرفش ليه رغم السعاده والحنيــــن
مااعرفش ليه يامصر صوت الناى حزين ؟؟

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: