الثلاثاء , سبتمبر 29 2020

مجرد سؤال …..شعر أحمد طليس

مجرد سؤال 

معاه أما بعد 

دا ليه كل قربك 

عواصف ورعد ؟
وليه كل همسك 
تحدي وعند 
وحاسس بقلبك 
مافيه أي نبض ؟
مجرد سؤال 
معاه أما بعد 
وليه ماتسيبيني 
ياغاوية أنيني 
ف ليل واللا برد 
ماتنسي هوايا 
معدتيش دوايا 
نسيتك معايا 
ضلة في صهد 
سبييني لوحدي 
ف ليلي وسهدي 
وآهي أيام تعدي 
ساعاتها في عند 
حقيقي طبيعتك 
تفوق أي وصف 
معاني ماليها 
ف كتاب أي صرف 
كلامك داكله 
مافيه أي حرف 
وله أي معنى 
حقيقي بجد 
دنا شفت حلمك 
جفاف كل أرض 
مدارك آلام 
وتكسير عضام 
دا نقص ف علام ؟
ودبلان أي ورد 
حقيقي كرهتك 
كرهتك بجد 
نسيت حتى حبك 
ولا محتاج لقربك 
هاعيش برضه بعدك 
ومهما ندمتي 
وعفوا رجعتي 
هاقول لك دا بعدك 
مفيش أي ود 
لاعمرك فهمتي 
سكوني وطبيعتي 
ولاكنتي إنتي 
وابدأ ماكنتي 
بتتمني قرب 
ماتنسي الحكاية 
خلاص م البداية 
كتبت النهاية 
مفيش بيننا حب … !!!!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: