الأربعاء , سبتمبر 30 2020

لحد مايكمل المشوار…..شعر مصباح المهدي

لحد مايكمل 

المشوار

شويّة كدب ف القرطاس

أقزقزهم

يعدّوني من الجمرك

أهزهزهم
يمشّوني ولو أسبوع
ف دمّي أنزيمات الجوع
عطش ممنوع من الميّة
شويّة صبر ف (الببرونة
أرضعهم
لحد مايوصل القبطان
لبر أمان أرجّعهم
شويّة حب عارف مش متاح الآن
راح استنى
لحد ما ألقى م الجنّة
نفس ع الأرض
شويّة شوف 
أشوف بيهم 
جبين بكره اللي ماشفتوش
شويّة كدب
أدهن بيهم الحاضر
أمل مغشوش
أقول حاضر
وامد إيديا وارسمني
بوش بشوش
واداري جراح بدت ونقوش
وابيّن ف البلاهة تحوش
أسى مزمن
أمد إيديا واسندني
قصاد الصعب متماسك
وابان ماسك ف أعصابي وانا منهار
ف ودني سلّطوا المزمار
ف قلبي نصبوا حلقة زار
وابان ماسك ف أعصابي
لحد مايكمل المشوار
عشانكم باحسب الخطوة تودّي لفين
حروف الكلمة بافردها على الجنبين
وافلّي الجملة حرف بحرف
واعرضها على مخبر سكن راسي
عشانكم بعت كرّاسي لبياع لب
وبعت ليوسف الكدبة
ف قلب الجب
شويّة حب
ماصعبتش عليك ياحب
طب كنت اعتبرني يتيم
شوية كدب ف القرطاس 
أقزقزهم
يعدوني بقلب سليم
أمد إيديا جوّايا
واطلّع منّي إيد تمسح على جبيني
وإيد تمسح دموع عيني
وحضن يقول :هنا بيتك
وحد يقول لي :حبّيتك
وصاحب ف الفرح والغم
أمد إيديا واسندني
واقول لي عنّك انته ياعم
لحد مايلقوا بيت غيري
لهذا الهم
شوية كدب ف القرطاس
أقزقزهم
يمشوني ولو أسبوع 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: