الخميس , سبتمبر 24 2020

أراجوز……………..قصيدة بقلم منى غنيم

في الدنيا عايش
أراجوز
جميل الصوت
والزعبوط
بيرسمونى سعيد
بيغنونى
والفرح مخاصمني
كل ما آأقول أه
الناس تقول الله
وأنا بغني حزني
الدمع جوه عيوني
بحر ماله شطوط
أه منه وأه منهم
وأأأه مني
أراجوز….
تحت زعبوط مستخبي
وابتسامه متلخبطه بالألوان
ترسمني
لغز في الجراب …
ملوش جواب
عايش جوه آلمي
صرختي بتموت في همسي
أبكي …
يبكي قلبي
ملاقيش غير إيدي
تمسح دموعي
بمسح دموعي
بكيت
قلت أه
قالو الناس … الله
خبيت دموعي جوه قلبي
ضحكت
و أنا ببكي
والدمع جوايا بيصرخ
عملت قطر
قلت توت
ردو ورايا
تووووت ..
توت
شفت الفرحه في عيونهم
شفت إبتسامه
إتمنتها إبتسامتي
قلت أه … قالو الله
عملت نفسي قلم
رسمت قلب كبير
وقفو جواه
قلتلهم دا قلبي
قالو زعلان …..
قلت منكم مزعلشي
أزعل إزاي
وأنتم جوه قلبي
أراجوز ….
عايش جوه حزني
راضي بحكم ربي
بحلم وأنا صاحي
وأنا نايم …
بعيش جوه حلمي
بحلم ألقى نفسى
ولا اشوف مره نفسى
جوه عيون حب يدفيني
من غير دموع أغني
غنوه تغنيني
غنوه تطلع من قلبي
حتى لو كانت أه
ويقولو عليها الله
من غير الوان
جوه إبتسامه
يرسموني
ويغنوني

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: