عمْ عيش مع طيفِك…..قصيده للشاعر علاء عوده

*

عَيَّدْتِك بْعيد القَلِبْ..
و بْعيد أمّي.. وْ عيد ميلادي
عيّدتِك بْأعياد رفقاتي
و بْكلّ ذِكرى بْيشبهِك فيها الوطَن

عيّدتِك بْعيد الشّعِر
و بْعيد ميلاد النّبي و الأولِيا
و بْعيد عمّال الدّني
عيّدتِك بْعيد الشّهيد المِبْتِسِم
وْ تَجْديد بَيْعة رَحمِك بْكِلْ شَهْرْ..
عيّدتِك مْنِ القهْرْ..

*

عيّدتِك بْيوم الطِّفِل
مِن هون حتّى تكبَري
و مَ بْتِكبري..
وِ بْيوم حُرِّيْةِ الصّحافة و النّشِر
شو بحِبّ إقراكي.. ولَوْ مَ بْتِنقَري

عيّدتِك بْنوروز
و بْعيد الفِصِح
عيد الغدير
زوري القَلِب.. يا زْيارة مقبولة
عَيّدْتِك بْصوم الْ بيصوموا
بْلقمِة الجوعان لِ بْياكُل عَ مهلو مِن كتر جوعو
عيّدتِك بْقلبي:
ما أكبَرِك.. ما أكترِك.. مع هيك شو بتساعِك ضْلوعو

*

عيّدتِك بْروس السّنة كلُّن:
كل يوم بِتْبلِّش سنة
كل يوم بشْتَقلِك سِنِة..

عيّدتِك بْمِعراج كلّ الأنبيا مِن غرْفِتِك تَ يْقابلوا الله
لوْ كِل نَبي بْيمرُق دَقيقة بْمعبَدِك:
كَنّو العُمُر صلّى

*

عيّدتِك بيوم اللّغة.. و تْعلَّمِت إحكي
ذْكَرْتِك بِ يوم الصّحّة -يوما العالمي-
وْ مَرَّقْت أحزاني بْمصَحِّة (تْ) بَسْمِتِك
وِ تْخَرَّجوا ضحكة ورا ضحكة

عَيَّدْتِك بْيوم الأرِض.. قلبي طفِل لاجئ
عَيّدتِك بيوم السّلام.. رْجِعْت عَ بيتي
عيّدتِك بْعيد الموسيقا.. وْ دندَنِك قلبي

كلْ يوم -وِ لْإنِّك مَرا- يوم المَرا
يوم القراءة العالمي..
وْ مانِك كتاب بينقرا..
مع هيك عم حاوِل..

عم عيِّدِك مع كلّ ذكرى بيعْرِفا الإنسان..
معقول -يا كلّ الرّبيع-
-و يا كذِب أبيض حلو-
يْطاوِعني قلبي إكذُب بْنيسان؟!