‏وطن …..قصيده للشاعر أيمن_الدسوقي‬

شَرّع الأحبة الكلام
و أنا
اللي خَلَّص حروفه
و شَرعه فيكي السُكات
و إنتي يا فرخ الحَمام
طايرة
و الفَخ ناصِب كماينه لينا
و كُلنا أموات
ما تُوهتي زي ما توهنا
في زحمة المَنسي
و زحمة الحِكايات
تايه مني حبيبة
حِلوة زي الطيبة
و أنا الطيب و الله
ما يُغرِك فيا
قَسوة الهِدمات
يتبعتروا ف ثانية
بِ حُضن وَسيع
كََ عشقة أرض عَ الزرعة
موش ضّمة الصوبات
موش ضمة الغُربا
و لا ضمة الحيرة في القُربا
ضميني ضّمة لُقا
ده اللقا بيفرج الكُربات !!!