الثلاثاء , أكتوبر 27 2020

عبده محـرَّم….شعر مصباح المهدي

عبده محرم ..
عاش وحداني ..
ومات ف الغيط !
عبده اللي ما كانلوش ولا غيط !
عدّا الصياد شايل شبكة
حط الشبكة .. بَصّ لقاه
حد يجيب الإسعاف .. 
ياااه
عبده .. وفاسه
وفاسه ف إيده
وعينه عليه
عيني عليه اللي عشان ياكل
تطلع حَبَّة بحبة عنيه
لقمته ضربة فاس عاجناها
صحته فيرس سي وراها
من ألوان الضعف الوان
لازم ياكل
ياكل مرته ؟
والا هتاكل مرته عياله ؟
وامه اللي ماهياش داعيا له
يخرج بدري
يشتال فاسه
يرجع بيه
عبده محرم ..
عمره ما كان أستاذ ولا بيه
شايل فاس من عزمه بياكل
زي ما شايل فيرس سي
خادم أرض لغيره بتدي
غارس دارس قمح لغيره
عبده محرم يعمل إيه ؟
يعزق أرض .. ينقِّي غَلَتْهَا
دَقَّه بدقَّه وعمره ما فاتها
فات كام عيل
فات ” معزوزه “
نفس الجوزه اللي أبوه فاتها
فاسه العرقان إيده ف إيده
ياما الفاس حَسّ بتنهيده
تحت الشجرة ..
اللي قطع منها الإيد للفاس
تحت الشجرة ..
امتدت إيد تكتم أنفاس
شرب الكاس
ما استناش يرجع
بقروش آخر دقة فاس
عبده محرم ،،

تعليق واحد

  1. مصباح المهدي

    شكرا جزيلا لكم ويسعدني الاشتراك في قناتي ليصلكم شعري
    من فضلكم اشتركوا في قناتي
    https://www.youtube.com/channel/UCTh90cyAmIOdGGXVKmXZhng?view_as=subscriber

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: