جريدة العربى اليوم الاخبارية
أدي الفراق وآدي اللي فارقونا
وآدي اللي نقشوا ف روحنا أيقونة
وآدي اللي خلونا نخاف نحلم
ونخاف ننام ونخاف كمان نعشم
ونخاف لـ نتقدم فنتأخر
كل اللي خططتله أهو اتبخر
والكون بيستخسر يكون عادل
ازاي يسخر عمري بالكامل
ويقولي نتبادل سعادة بحزن
كان قصده يخطفني لبرة الحضن
ومن عدن فوق الأرض متشرد
مقدرتش اني اعترض ولا اتمرد
ومجرد اني بقول ساعات لأ
أيّد على دفتري ميتين سابقة
وعيوني لجأة للسما بدموع
أمطار دعايا بتشرح الموضوع
والجوع لرد السما يوماتي يزيد
تنزل دموع السما كما العناقيد
والأيد بتترجاه يهد الكون
الدنيا مش حلوة ولا لها لون
وجنون حياتنا مصعّب العيشة
ياريتنا كنا بجسم كالريشة
وف طيشة من هجمة رياح نتشال
حتى البراح الحلو بقى نشال
تيجي من شمال الكون يضيق ف يمين
تايه قوي وبرئ من التكوين
لحد مين بيوضح الرؤيا
عدسة كواكب بصرك الباقية
وساقية بتدور بيك كأنك طور
لو دي الحياة ؟!
يبقى الحياة دي تغور!!
