الثلاثاء , مارس 9 2021

ناهز زكريا يكتب ……الراجل اللي خطف الطيارة

مبدئيا كده،اللي يقول علي الراجل اللي خطف مصر للطيران( مش الطيارة بس) ،انه اهبل او مضطرب نفسيا،يبقي هو الأهبل وهو اللي عنده ستبحس !!!!

الراجل ده عاقل جدا ونجح في مهمته بكل سهولة !! الراجل طلع الطيارة وثبت كل الطاقم بما فيهم الكابتن ،بقلم جاف،!!!!وغير مسار الرحلة لدولة تانية،وقبض القرشنات من الجهة اللي وظفته،، وأستهزأ بالأعلامين وامن المواني ،وقال اصل انا عاوز ارجع مراتي وحماتي مش راضية!!!

الأهبل هو امن المواني اللي فشل في تأمين طيارة داخلي بعد حادثة طيارة روسية قتل فيها اكتر من ماتين بني ادم،علي اعتبار ان الطيران الداخلي مافيش فيه مشاكل !!! ومش لازم يكون في الرحلة فرد أمن متمرس علي مواجهة حوادث ذي دي.

الاهبل هو المسؤل اللي طلع علي كل القنوات العالمية( شفته في اخبار بولندا) وقال الحمد لله ماحصلشي حاجة والناس سليمة!!! لكن مصر سمعتها بقيت في الأرض لفشل جهازها الأمني وفساده.

الأهبل هما الأعلاميين اللي هايحتفلوا بطقم الطائرة اللي اقنع الراجل انه ينزل المصريين !! رغم ان الخطة كانت فعلا هي خطف الأجانب حتي تسحب روسيا كلامها في عودة السياحة الروسية بعد شهريين،والخطة انه يتم تدمير مصر سياحيا اكثر واكثر،ويظهرها امام العالم وكانها دولة ضعيفة.

في بولندا استضافوا واحد من امن المواني والمطارات،والراجل قال ان قواعد الأمان في المطارات هي قواعد دولية وهي مطبقة في مصر وفي كل دول العالم ،ولا يؤثر فيها رجال الأمن المكلفين بها،،، لكن الراجل لم يذكر اي شيئ عن امن الطائرة اللي بيسافر معانا كل مرة واللي هو المفروض يكون علي رحلة طيران ،خاصة اذا كانت شركة وطنية !!

السنة اللي فاتت مساعد الطيار الألماني قفل علي نفسه الكابينة ودخل بالطيارة في جبل صخري،عشان الناس تروح معاه الأخرة تونسه،،تاني يوم كان القرار الجديد ان اي كابينة لازم يكون فيها اتنين مساعدين مع الطيار،عشان لو واحد منهم جات له شوطة فراخ في دماغه ،يكون في بديل وعشان الكابينة ماتتقفلشي علي راجل واحد،،، اما عندنا في مصر ،فالقاعدة هي،العمر واحد والرب واحد،وقدر ولطف ،وماحدش هايمنع القدر!!!! جاتكم القرف ،فضحتونا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: