هل منتخب مصر للناشئين فى كرة اليد
فكّر فى تكريمه بالشكل المناسب حدّ
من بعد فوزه بكاس العالم ؟ اتمنى
على سؤالى البرىء الساذج اسمع ردّ !
****
حكاية أهلى بينافس زمالك
بقت نكتة فى زمن الفمتوثانية
فإما تطوّروا تفكيركو ذلك
وإما تدورّوا على لعبة تانية !
****
قولوا لوزيرة الشئون قلب الوليّة انفطر
م الحزن وكأنها صحرا هَجَرها المطر
إلغاء مساعدات (تكافل) كارثة مالهاش مثيل
وآدى الدليل يا وزيرة ( حياة كريمة ) ف خطر !
****
وباقول يا مستغربين هذا الخروج المهين
وحزانى على منتخب فاسدين ومتحرشين
الكورة أخلاق وفن وخبرة وإدارة
ويا ريت بقى تعرفوا فين احنا والدنيا فين !
****
اطوى الجريدة يا صاحبى واقرا الوشوش
تلاقيك عرفت اللى انت ما بتعرفوش
الناس كتاب مفتوح بينقل لنا
صورة وطن حقيقية من غير رتوش !
****
أنا لوح خشب فى ورشة منسيّة
وانت الكبير ، شيخ الصنايعيّة
ماتخلّنيش نيش أو دولاب أو سرير
اعملنى حتى انشالله طبليّة !
****
وحشتنى يا مّه قُلّة الفخار
أم المياه صحية باستمرار
من غير لا تلاجة ولا قزايز
بلاستيكية كلّها أخطار !
****
فيه عندى فكرة يجوز تهدّى النفوس
وتزيح عن الخلق النكد والعبوس
من قصة التعويم وسعر الدولار
خلّوا اللمون عُملتنا بدل الفلوس !
****
كيلو اللمون لما وصل ميت جنيه
خلانى – بعد مرارة الفقر- بيه
لأن قدّام بيتنا شجرة لمون
زرعها ابويا رحمة الله عليه !
****
بالاختصار وعلى سبيل الحصر
فيه عندنا إنجاز وحيد فى مصر
إنسان بسيط اسمه محمد صلاح
فكّرنا من تانى بطعم النصر
****
