الرئيسية / كتاب وشعراء / موج البحر والعقل …….شعر محمد سعيد القشاط

موج البحر والعقل …….شعر محمد سعيد القشاط

موج البحر موجه وراها موجه
وانا العقل موجه ينصدم باللوجه
————
موج البحر يطًوًى
ايطاوع زعازع ريح واخذ جوًه
وانا العقل طول الليل كابر نوًه
يفوًت رواج اتجيه تعقب روجه
كما الطير وين الفجر يبهر ضوًه
يغيب في الزروقه في وسيع انهوجه
وكان شفت حال الحايله من جوًه
تلقاه من صمل الصميلة جوجه
العطشان يحضر لجل كان تروًه
سكب ماه مغرور السراب رهوجه
دخل قايلة وكبرت عليه الصًوًه
قصير وعد خطفاته ثنيًه عوجه
———–
امواج قوافي
ورا بعضها تطاوع هبوب السًافي
وانا العقل بين الماضية والقافي
راقي شخانيب الجبل وادروجه
ويقطع مزازات الحفايف حافي
عاكسات مضمون لبراج ابروجه
بلا مكرمه كل لوطان منافي
بلا عز معكود الحيا ممجوجه
ان كان ماشربته من المنابع صافي
مايصيغ شربان الغتر واخموجه
ومن عاش طول العمر في لرفافي
ايظل بالهزايب عيشته ممزوجه
ومن كان قوته الدهر في لقحافٍ
ايظل كيف تتًه سيرته مخلوجه
ويوساع مشروكه على اللي رافي
ولا بيه تتحزًم نهار الحوجه
———–
موج البحر يتقانى
يهاوز على الساحل يريد مكانه
وانا العقل يغلي فايره سخًانه
دخل مرمره وصاعب عليه اخروجه
لا الوقت وقته ولا الزمان زمانه
يكهًب على اللي امحينه منبوجه
لا في المواكر قاعدين برانه
والخرب ولًى في مكانه خوجه
تقصًف بدي فوق لركاب اكسانا
وخن الحضيرة منذبح فرًوجه
هانه ورا هانه وراها هانه
على وطن ولًوا الحاكمين اعلوجه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: