البطلة كانت فتاة مراهقة 14 سنة وكعادة المرحلة دي كان ليها صديقة بتعتبرها المفضلة لديها وبتحب تقلدها في كل حاجة وبسبب ده اتعرضت لمواقف مؤذية آخرها عملية اختطاف مدبرة.
فيه مشاهد كتير استوقفتني منها مثلا:
– اهتمام الأم والأب بمشكلة بنتهم وعرضها على طبيبة نفسية تسمعها وتساعدها تشوف نفسها أوضح.
– ماعنفوهاش ولا مرة رغم إن أبوها اتعرض لفضيحة في شغله بسببها.
– أسلوب الأم الواضح بحزم لما بنتها هددتها إنها ممكن ماترجعش البيت بسبب عقابهم ليها قالت لها “احنا في جانبك..وبنحاول نساعدك في حل المشكلة وماتتكلميش بالطريقة دي تاني”
– الأم كانت منتبهة جدا لأي تصرف يصدر من بنتها بعد كده.. حتى لو اتأخرت شوية في الحمام مثلا.
– لما اكتشفت اختطاف بنتها وبلغت.. الشرطة خدت موقف سريع وبالاستعانة بالطبيبة النفسية قدروا يجيبوا عنوان الخاطف ويسيطروا على الموقف.
-الخاطف كان بيستغل قسوة الأب والأم على الفتاة وغضبها منهم وإنها بتحكيله على كل حاجة واعترف لها إنه حاول يدمر مستقبل أبوها وأمها علشان مايبقاش معاهم فلوس يودوها لطبيبة نفسية! ولما البنت قالت له إزاي تعمل كده دول أهلي.. كان رده “بس مضايقينك!”
للحظة حسيت بخطورة إن حد في لحظة غضب ويشتكي من أهله لحد معتقد إنه قريب منه.. دي لوحدها كارثة فعلا.
– الخاطف مقدرتش أستوعب هو بيعمل كده ليه ولا إيه نوع مشكلته النفسية!!
لكن في العموم
الفيلم جميل جدا، وهادف أنصح بمشاهدته.
