ريهام عرفات تكتب : القاموس الفكاهي للأم المصرية !
الام
المصرية دمها خفيف… حتى لما بتزعق لعيالها وتهدر كرامتهم برضه دمها خفيف…وكل الامهات
لهم نفس الجمل ونفس طريقة التهزيق لعيالها…(المقال مش من خيالي.. انا استعنت بذكرياتي
و باصدقائي وببعض التعليقات على النت ) ….ومن الجمل المأثورة:
– سيب
الزفت اللى في ايدك (على حسب الموقف بقى الزفت ممكن يكون تليفون او كمبيوتر او لعبة
او ساندوتش..الخ)
– في
اي مناسبة “انا مش عايزة هدية…انا عايزة عيال محترمة ومتربية”
– تاكلوا
ايه؟
– تفي
على وشي ان فلحتي (واحيانا على قبري)
– اوضة
دي ولا زريبة ؟ (سبحان الله انا كمان بقول كده – الدم يحن برضه )
– انا
اصلي خدامة اللى خلفوكوا !
– عفاريت
الدنيا بتتنطط في وشي وروحي في مناخيري!
– انا
زمان كنت رفيعة ووسطي زي الكحكة!
– انا
اصلي مخلفة بقر! (احيانا بهايم)
– هوا
انا لازم اجي اشاور على الحاجة علشان تلاقيها؟
– يا
فلاااااانة…ولما تروحي لها من اخر الشقة وتسيبي اللي في ايدك تقولك “ناوليني
الريموت” (اللى قدامها)
– ربي
يا خايبة للغايبة
– انتوا
مش بيطمر فيكوا حاجة؟
– يعنى
انتى مش شايفة الورق اللى في الارض؟ وكمان بتعدي من فوقيه ؟ ايه البرود ده! ده انتى
بيتك هايبقى معفن!
– بطل
تلقط من الاكل قبل الغدا مش هانلاقي حاجة ناكلها
– مفيش
ساندوتش..هو رز وسبانخ لو مش عاجبك ماتاكلش!
– ما
هم الصيع اللى انت ملموم عليهم دول السبب!
– وطوا
التليفزيون شوية…الجيران عندهم واحد..انتوا طرش؟!
– اللى
هايتجوزك امه داعية عليه ( حبيبتي يا ماما )
– صحتي
خلصت عليكوا
– انا
لو بربي حمير كانوا فهموا
– عايز
ايه من التلاجه ؟
– انتى
بتعملي ايه في المطبخ ؟
– اللى
بتعملوه فيا ده هايطلع على حبابي عنيكوا من عيالكوا
– يا
رب تخلفي عيالك زيك! ( دعيتيها يا ماما و دعاكي رشق )
– البلوزة
ضيقة (هاتوسع في الغسيل)..البلوزة واسعة (هاتكش في الغسيل)
– هاتي
لي شبشب الطم بيه !
– اصوت
ويقولوا الولية اتجننت؟
– بكرة
لما تخلفي هاتعرفي قيمتي
– مين
الهبلة اللى هاترضى بيك دي!
– بقينا
العصر قوم !
– الطحالب
طلعت عليكي….قومي اتهوي من مكانك
– جتها
نيلة اللى عايزة خلف!
– انا
مش هاسخن الاكل تانى
– قومى
روقي الشقة – انشري الغسيل – اغسلي المواعين…لمي الغسيل وطبقيه ( ياختاااااي)
– اللى
في سنك فاتحين بيوت وشايلين عيالهم!
– اكل
ومرعى وقلة صنعة!
– متكوريش
الفوطة كده افرديها هاتكمكم!
– ايه
كل الغسيل ده ؟ حرام عليكوا!
– لما
توصلي رني عليا
– حطي
الاكل في التلاجة
– براحتك..اللى
بيشيل قربة مخرومة بتخر على دماغه
– انا
هاسيب لكم البيت وامشي
– انتوا
بتاكلوا في قتة محلولة مش حاسين بحاجة
– اللى
عايز حاجة هايعملها…ده في عيال بتذاكر على نور عواميد النور علشان يفلحوا وانتوا
فاشلين ( الجملة دي مش غريبة عليا )
– ادي
اخرة الدلع ! تستاهل!
– ماما..
– انا مش ام حد…
– ما
بدري يا بيه !
– انتوا
فاكرينها لوكاندة ؟
– يا
تذاكر يا تقوم تجيب عيش من تحت
– هاقول
لابوكوا لما يجي!
– يقطع
ماما وسنين ماما وسنينها السودا!
– بعد
ما تحدف شبشب على حد من عيالها تنده له يجيب لها الفردة الطائرة
– امشي
من هنا مشش في ركبك
– يا
ربي انا مخلفة عاهات؟ – واحيانا بهايم – حمير – جاموس – متخلفين!
– لو
ماشلتش حاجتك من الارض هارميها في الشارع
– ما
تيجي تاكلني احسن..ما انت لسه واكل!
– لما
الاكل يتاخر على النار “اولع في نفسي تحت الحلة؟” او “هوا انا النااااار؟”
– بطلوا
افترا..بكره تتمنوا عيش حاف ماتلاقيهوش
– يخرب
بيت الكمبيوتر – الموبايل – السماعات – التليفزيون..الخ
– انت
عايز تجيب لي الشلل؟
– لما
تسئلها احط اي حاجة فين ترد “فوق راسي!”
– ما
انا قلت لك…بس كلامي انا مش بيعجب! تستاهل!
بس الام
المصرية تدعي على اولادها من ورا قلبها وتكره اللى يقول امين … بتدعي لاولادها وتنسى
تدعي لنفسها…احن واجمل ام في الدنيا كلها
ربنا
يخلي لنا امهاتنا و يرحم امواتنا ، آمين