كتاب وشعراء
بتبيع لمين ……بقلم سعيد شكرى
الفل والياسمين
هتلاقى فين عاشقين … يابستانى ..؟!!
طعم الحياة تانى
وإحنا اللى مش عايشين ..!!
ماشيين على المألوف
ياجرحنا الموصوف
ميل علينا الخوف … من السكة ..!!
ياغربة الضحكة
ف وشوش ماليها الخوف ..!!
إدينى من عمر الهنا … ولو يومين فكه
من غير ماتتكه
على جرح ملو الشوف ..!!
تصاحبنى ع المعروف … ياتنسانى
طعم الحياة … تانى
وإحنا اللى مش عايشين ..!!
بتبيع لمين ..؟!!
قلبك خضار منكرش
بس اللى عاش ماسلمش ..!!
م المر لازم يوم … هيخاف من السكر
ياحلم متعكر
مين فينا ماتألمش ..؟!!
وانا عمرى ألف ربيع … يجوز أكبر
بس الوجع أكتر
حتى الفرح ماكملش ..!!
والدمع فوق الرمش … بيعانى ..!!
طعم الحياة … تانى
وإحنا اللى مش عايشين ..!!
بتبيع لمين ..؟!!
