مقطوفة.. شعر: كمال سنوسي

ومقطوفة ..
عناقيد عنبكم ويا العمر مقطوفة
وعنبكم كان بناتى ..
الشجرة كانت مر .. الطرح كان حصرم
وتروس دايرة بوجعكم
وبتعصر فيكوا وتفرم
واغصان بالشوك ملانة
حوالين الروح ملفوفة
ومصفوفة ..
فساتين زفافكم بلون الحزن
ع الطريق مصفوفة..
ومقصوفة..
رقاب العوزة والحاجة مقصوفة
وجه الأرض كان قاسى بلا رحمة
يمكن تكون بطنها رحيمة وعطوفة
كانت لحوم الصغار لسه بخيرها
لسنان الوحش موصوفة
ومخطوفة ضحكة بنات
لسه بطعم سكر نبات
من جبين أحلامها مخطوفة
وملهوفة…
صغيرة بتجري للقمة عيش
وكل الحلم أنه تعيش
تخطفها ايدين الطيش
وقلوبنا عليها ملهوفة…
ومكتوفة العيون والايد
كانت عاوزة لبس العيد
وتتزوق لعمر جديد ..
واتعلقت فى دواليبها.. هدومها مكتوفة
أنا شفت الفيلم زمان
متعاد فى كل زمان
البطل الصغير غلبان
وكبير لكن شرير
بيدوسه ولا شايف .. أحواله وظروفه
امتى بس مرة نشوف
الخير ينتصر ع الخوف
أصلها بس فى الأفلام
دى نهاية معروفة…
شعر: كمال سنوسى