أنس دنقل يكتب : حدوتة علي بابا والاربعين حرامي !!!
العرب بصفة خاصة ومعظم الدول المتخلفة عموما يحترمون ويحبون شخصية علي بابا..يصنعون التماثيل للست مرجانة شريكته في اللصوصية..سيدة قصر الحاج علي بابا..شاهدت تمثال ضخم للمرحومة مرجانة في اكبر ميادين بغداد !!
مع كامل احترامي لتلك الرؤية المتخلفة اسمحوا لي ان اخالفكم الراي واعترف لكم انني احب واحترم الاربعين حرامي وليس ابن الكلب علي بابا للاسباب الاتية :
_ بالتاكيد نحن مرضي نفسيين منذ الازل نقدس ونحترم الحرامي الكبير..نهتف له..نفديه بالروح والدم بينما لانحب ولانحترم اللصوص الصغار نضربهم علي قفاهم ونعلقهم علي الفلقة في اقسام الشرطة..ننظر لهم نظرة دونية باعتبارهم شوية هفايا مرتشين زينا..لو انصفنا لاعتبرناهم اولاد عمنا واخواتنا في طفولتنا الغير سعيدة!!
_ يمكن باختلف مع اولاد عمنا الاربعين حرامي في نقطة واحدة: ليه يا اولاد الكلب حاطين الفلوس في المغارة اهو اخدها علي بابا ومرجانه وسلقت دماغكم بالزيت المغلي ..يمكن بني بيها قصر في الساحل الشمالي..ارتحتوا بقي ؟؟!!! يعني لو انتو ولاد ناس وبتفهموا ..جيبو الفلوس ..شبرقوا علي عيالكم هنا وعيال عيالكم اولاد عمكم الغلابة اللي قاعدين جنبنا ايد ورا وايد قدام !!
( افتكر..كنا نزوغ من الكمساريه في المواصلات العامة ..عندما يقبض علينا الكمساري المرتشي الصغير ياخد رشوة صغيرة ويسيبنا اما علي بابا فيجبرنا علي دفع غرامة كبيرة واجرة تذكرة مضاعفة ونحن يامولاي كماخلقتني والله اعلم!!)
اتذكر زوغت في القطر من محطة قنا الي محطة بالقاهرة اكتر من 600 كيلومتر لكن علي بابا عليه كل لعنات الارض والسماء الواقف بمدخل رمسيس اكتشف تزويغي..
ورغم ان سعر تذكرة القطار ايامها في ستينات القرن الماضي فقط 70 قرشا لكن المرحوم علي بابا اجبرني علي دفع جنيه كامل بعد كل التوسلات والبوس علي راس امه !!
يا اصدقائي ملعون ابو علي بابا اللي بينهب لوحده هو والست مرجانه مراته القرشانه !!
عاش الاربعين حرامي..بس يفتحوا شويه ويرشوا ع الغلابه اللي زينا..ربنا يكرمنا ويكرمهم جميعا حتي لو بقوا مية مليون حرامي..اتمني ذلك !!
