أنس دنقل يكتب :النضال والجواز وسنينه !!!

الجواز والعيال مقبرة الحرية والنضال.. احرار العالم عزاب لم يدخلوا دنيا..مصطفي كامل..محمد فريد..سليمان الحلبي..جيفارا..سليمان خاطر..عبدالكريم قاسم العراق..ابوالقاسم الشابي تونس !!
(جملة اعتراضية: اضافة لمن سبق ذكرهم..علي المستوي الشخصي والمحلي يمكن اضافة الاتية اسمائهم من زعماء الفكر والرأي بقريتنا وهما:
1_ البرطازي: عامل خدمات بالوحدة المحلية..اخصائي شراء الجرائد القومية لرئيس المجلس..يقرأها من الجلدة للجلدة.. يجلس بجوار الوحدة الصحية يقرأ ويفتي للبهايم حوله عن:
اهم مشاكل العالم..ازمة الصين وامريكا..الاميرة ديانا والامير تشارلز..
اعتبره الاستاذ الاول والحقيقي للاعلامي الكبير توفيق عكاشه !!
2_ اشهر عازب بمركزنا :
ابن عمتنا: العمدة ملاح وزيري عمدة قفط وقوص وكردفان بالسودان ومابينهما.. من يخالفه الرأي واطي وابن ستين كلب لامؤاخذه..واولهم انا..
يتحدي مخالفيه باستعداده اثبات بالاوراق ملكية اجداده لحقول غاز سيبريا بروسيا ..
اعظم من يقوم بعمل حلوي “ام علي” واللحم المشوي بالفحم..تلك اهم اسباب قبولنا لسيادته وارائه وتطاوله واحتقاره لاجدادنا جميعا..رحمه الله)
نرجع لموضوعنا الاصلي :
العازب يعيش وينام علي مصطبة ترزق.. لاشايل هم بكره ولابعده..نومة السجن وسط الرفاقة احلي من برد ووحدة نومة الرصيف !!
انصاف الثوار والمصلحين..متزوجين لم ينجبوا: سعد باشا زغلول..مصطفي باشا النحاس..الحبيب بورقيبه تونس
امثالنا المتزوجين ويعولوا لاتنتظروهم : ايدك والارض..اعظم ساعات نضالهم: خد كيس الزبالة وانت طالع..هات كيس عيش فينو وانت جاي..ماتنساش تجيب جبنة لزوم سندوتشات العيال !!
المتزوج او المتزوجة حمار ماشي يجر وراه مقطورة تقيلة..لازم يمشي بالحمل ويبرطع اظهارا لفرحه بالعز اللي هو فيه..ربنا يعينه !!
تصدق بايه ؟؟!! احمد موسي اللي هو احمد موسي..شبشب حمام الحكومة..كان ممكن يبقي بني ادم لولا الجواز وسنينه..المدام عايزة فخدة ضاني ..العيال عايزين يصيفوا في العلمين..السكر غلي ياحماده..اسرق عشان نجوز العيال ياحماده..نشتري لهم شقتين في التجمع الخامس او بدروم في بولاق الدكرور..امشي جنب الحيط مش ناقصين ندفع لك كفالة في المحكمة !!
كبار القوادين..المخبرين والجلادين..تجار الصنف..مقدمي ومقدمات برامج التوك شو بتليفزيونات العرب والجواسيس ومزوري العملة وصناديق الاقتراع جميعهم ازواج طيبين مثاليين مثلي ومثلك فلاتتعجب !!
في بلادنا الزواج عقد تنازلات تبدا بتسليم رقبتك للزوجة والانجال والمهر وقائمة المنقولات ومؤخر الصداق تنتهي بتسليمها لرؤسائك في العمل وماموري الضرائب وامناء شرطة القسم القريب واعضاء الحزب الحاكم انتهاء بمذيعي النشرة الجوية واخر اخبار انجازات الحكومة العملاقة!!
الجواز والعيال مقبرة الرجال والنساء ..اسالوني انا !!
لهذا انصح كل حكومات العالم المتخلف بسرعة زواج كل شباب عالمهم البائس ليستمروا في تخلفهم..ان شا الله يخلفوا نسانيس وقرود يتلهيوا فيهم..في الوقوف امام طوابير الخبز المدعم..تدبير مصروفات المدارس..شراء البامبرز من استطاع اليه سبيلا !!
ياحاج مبلولي: العزوبية والعنوسة خطر داهم علي الكرسي فاجتنبهما !!