بنسى نفسى وأسرح ساعات……بقلم محمود يونس

بنسى نفسى وأسرح ساعات
وتأخذني الذكريات لبعيد
وأقفل عيونى
وافتكر اللى فات
أرجع لوقت ما كنت
فى المدرسه
والصحبة اللى كانت
والحب اللى مات
وفرحتى فى يوم نجاحى
واللى كانت
يوم ما اقول انى فرحت
يا دوب ساعات
وأول مرة أكتب جواب
وأرجع بسرعه وأقطعه
وأقول كلام فى السر لكن
اتمنى إنها تسمعه
ولما يوم بكيت عشان
حلمى اللى كان
ممكن يضيع
وبكيت على صاحب
قلت مش ممكن يبيع
بس باع
بعدها اتعلمت أكتب
لحاجات كتير كلمة وداع
وأول مره كتبت شعر
وأول مرة يكون لى سر
وأول مرة اشوف عيون
بتبص لى جواها سحر
وكلام كتير
خلانى أعيش احساس جميل
وابدا أغير
وأرجع لوقت ما كنت عايش
بشعور برئ بين البشر
وإن الحق حق
وفى النهايه بينتصر
بس لما كبرت حبه
كل المعانى اتشوهت
والحق جوايا انكسر
كنت برسم فى الحياه
أحلام كتيرة وأمنيات
وبعد آخر تجربه
لقيت الدنيا ادتنى حاجة
وأخدت منى كتير حاجات
محمود يونس