زجل… بقلم الشاعر: حَسَن أَبُو عَمْشَة

أوووف…أوووف…أوووف…

يا خليل من ورا الزلمي المرا
يا إما غير محترمة يا مقدَّرة
إنت وشنصك علبة مسكَّرة
ودَور الزلمي إن رجعت لوراااا

الله رزقني من عندو جوهرة
عاشت إيدي وإيدها مزنَّرة
شغلي وياها على المِسطرة
نربِّي أجيال طلعوا مفخرةااا

عشنا ربع قرن الإيام مزهرة
وتلات قمار بقدرة إله إنبرى
بصبيين وبنت منو مصوَّرة
رزقة الرَّب هيدا الِّي جرى ااا

زارها مرض وعليها افترى
فتَّاك ما إلو دوا وردّها لْوَرا
هوي خبيث وجسمها اهترى
سنتين وعلاجها متل مسخرةااا

ختمها بموتها بليلة منوَّرة
كانت تصلّي وبوَعِيها مْسَتَّرة
تقرا السُّوَر بطريقة مبعثرة
تذكر الرَّب وتطلب يستراااا

وسلمت الروح بآية تِذكرا
والشَّهادة عا لسانها مُبهِرة
وغمَّضِت العين بدمع سرى
وودَّعتنا بدعوة بضَلّ إتذكَّراااا

وصلت الجِثِّة عالبيت متأخرة
الحضور كبير والاماكن مسكَّرة
والبِكي من فج وغميق ناطرا
وبعد الغسيل يلا عالمقبرةاااا

الحضور ياخليل بيمشي ورا
الجنازة والناس كتير مجمهرة
هيدا دليل المحبة والاحترام
للحبيب لي خرَّج منهم دكاترةااا