ناس وناس وناس ..
شعر : سامي القريني
ناس وناس وناس
سيبك منهم
فيه ناس كياده ومِتكاده
وناس عَالشر مُعتاده
وناس بتكرهك بزياده
وناس الطمع والحسد
بقي عندهم عاده
سيبك منهم
إمشي فطريقك عدل
بكل عزم وإراده
إوعي تنسي صلاتك
والعمل والأمل والعباده
ماترضاش إلا بالرياده
ناس راسمه لك صوره
مريضه فخيالهم
حابسين نفسهم جواها
يلزمهم طبيب نفسي
يسكنوا عنده فعياده
خللي نجاحك يجننهم
قدملهم لما يزوروك
قهوه ساده
يترحموا علي نفسهم
يأكلوا بعضهم مِالغيظ
أصل أم الحقد وَلّاده
مابتبطلش عيونهم
بَصّاصه حَسّاده
مهما كانت رقبتك
ليهم كتير سداده
ناس مستصغراك
مستكتره عليك
أي سعاده
كده من غير سبب
مش حاتراضيهم
مهما تخدمهم
ولو عملتلهم داده
قله أصلهم تغلب
ماهي العروق
دساسه ومداده
سيبك منهم
البعد عنهم عباده
