قصيدة لعشّاق اللّغة العاميّة
ياما نطرتَكْ تحت السَّجريّي
من أوَّل نظرة
وِقْعِتْ عينك بعينيّي
ع هبوب النَّسمات
سارحة إغزلْ أحلام
بخيوطِ الشّمس الذّهبيّي
بقلبي يغرِّد الوعد
بإيدي باقةٍ ورد
حَمْرا جورِيّي
ناطرة إسمعْ خطواتَكْ عالدَّرب
بعيوني خبّيلكْ نظرةٍ حِنِّيِّي
إِعْزِفْلَكْ ع وترِ الشَّوق
مَوَّالِ الحُبّ
رَنْدِحْ لعيونك غِنِّيِّي
هَزار ع هاكِ الغصن
بْغَرْداتو يواسيني
وحمائم بيض تضربلي التَّحِيِّي
ما عرفتْ كيف هرب الوقت
غِفْيِتْ ع زِنْدِ الوهم جفوني
دِبْلِتْ بالرّاحة الوردات
كرجتْ ع خدّ النَّطْرَة الدَّمْعات
لمّا سَقْسَقْ غروبِ الشَّمْس
وْغَطِّتْ ع اكتافي العَشِيِّي
