لو قالولك .. إنى شايل ..
فوق كتافى .. جرح طايل ..
حتى روحى ..
قولى فرع حزين ومايل ..
تنه شايل ..!!
شيلته .. قادر ..
تتنى عوده ..
ده اللى زيه ..
قطعه أحسن من وجوده ..!!
كان تقيل الدم
شايل هم .. ياما ..
بالسلامة ..
خلفة الشوم والندامة ..
يعنى لما يخسوا واحد ..
تبقى هتقوم القيامة ..؟!!
دول يادوبك رطش ..
فوق وش الرصيف ..
همهم .. غمسة ورغيف ..!!
أو مجرد صفر مركون ع الشمال ..
تاه ف سلة مهملات .. ” واحد صحيح ” ..
قولى لم ..
قولى غم ..
قولى قد الدنيا ذم ..
وانتى بتحبى الأهم ..!!
فالمهم ..
رميتى طوبتى
رغم إنى ..
طيبتى .. كانت ساندة ضهرك
عمرى ماشكيت ف طهرك
عمرى ما حسيت بإنك ..
مش حبيبتى ..!!
بالمقابل ..
سيبتى روحى لريح مقابل
كل لحظة .. يشن فيا
ينفض الباقى ف دموعى
يحصد الحيل اللى بتعكز عليه ..
ويسد جوعى ..
ازرع الأحلام .. سنابل
بين ضلوعى ..
تطرح الأحزان عفية ..!!
إتولد جوايا خوف ..
خطا حد الشوف .. وعدا
وإنتى حكمانى بظروف
بكره .. أوحش م النهاردة
واللى عدا ..
فات وعدا ..
بس عدى الباقى عد ..
اللى عيشت أبنيه فى عمرى ..
كل مرة بيجى أرض ..؟!!
هاتى كل اللوم عليا ..
قولى فاشل ..
قولى فاشل .. طول و عرض ..!!
بس إوعى تقولى خاين .
بس إوعى تقولى خاين
دى الخيانة ليها ناسها ..
واللى متربى ف ونسها ..
واللى داق من مر كاسها
عمره يوم ما ها يبقى خاين ..!!
واللى باين ..
من كلامهم ..
إن حسبتهم صحيحة ..
وإن انا كنت الدبيحة ..
فا دبحينى بدم بارد ..
قولى كان ملعون وشارد ..
موته ح يدارى الفضيحة ..!!
