البنت شالت حلمها البفته
على كتف وردة ف خدها الدبلان ..!!
عدى النسيم على خدها أفتى
إن السعادة لسه بالإمكان ..!!
حاول يدوق من شهدها قطفة
دبت حريقة ف قلبها العطشان ..!!
والصيف حصيرة والسهر يحلى
وعنيها عبت م الكلام قناطير
لسه النهاردة ف اول الرحلة
ركبت دماغها ف لحظة ناوية تطير ..!!
زى الفراشة .. او يجوز أحلى
والنار بتحرق م الحاجات دى كتير ..!!
الفرحة زى الريح .. ماتمسكهاش
والسكة صعبة .. وإحنا بنخاطر ..!!
غفلت عيونها .. الحلم ماستناش
خلص عليها .. والشيطان شاطر ..!!
طاب كان يسيبها تعيش مايقتلهاش
وأقل حاجة بتجبر الخاطر ..!!
عبيت يناير والكتاب ف الدرج
وقتلت يوليو بيونيه وبأمشير
طلعوا البنات يتقصعوا م الخرج
رسموا البنات الفرحة بالطباشير ..!!
احلامنا كانوا مكسحين او عرج
احلام اخينا بتجرى ع المواسير ..!!
الصورة ف البرواز ماهيش مايلة
حالنا اللى مايل .. والعتب ع الشوف ..!!
حلمك إزاز وإيديك ماهيش طايلة
وعنيك بتفضح نيتك .. م الخوف ..!!
محروق بجاز الخوف بلا خايلة ..!!
حنطاطى ليه ماهو كدبهم مكشوف ..!!
الليل نواصى وقاعدة وسيجارة
والحارة هس .. وقلبها مرعوب ..!!
كتب التاريخ .. تشبه لخمارة
والناس سكارى ووضعهم مقلوب ..!!
وانا قلبى طعم وبات ف سنارة
اخر المتمة لقيته قالب طوب ..!!
