= ايوه في نظام عالمي جديد اتولد خلاص بالفعل … حتقولي انت بتهبد يا عم خالد … طب اصبر عليا …انا ممكن اسرد لك عشرات الادلة على ذلك … بس عشان مساحة البوست حاكتفي باللى حصل خلال اخر اسبوعين فقط:
= موقف اسبانيا من تحدي امريكا علنا … وقبلها مواقف حليفي امريكا الاقرب كندا والمكسيك … وامتداد ذلك للقارة العجوز اوروبا مثل ايطاليا وبلجيكا وغيرها …
= ارسال النرويج وتسعة دول اوروبية (اغلبهم اعضاء ناتو) قوات مسلحة الى جزيرة جرينلاند فى تحد صارخ لاعلان واشنطن رغبتها في ضم الجزيرة.
= زيارة رئيسة حزب الكومينتانج التايواني لبكين وتصريحها انها لا تمانع من وحدة تايوان مع الصين بشرط ان تتمتع بحكم ذاتى واقتصاد حر غير مرتبط مع بكين … اللى حصل ده تغير 180 درجة فى موقف السياسيين التايوانيين اللى كان مبدأهم الاول احنا مش صينيين !!
= أعتذار رئيس كوريا الجنوبية عن إطلاق طائرات مسيرة إلى كوريا الشمالية ده حصل من 3 اشهر !! … ولكنه اعتذر دلوقتى واصفا ذلك بأنه “تصرف غير مسؤول” و”متهور”. ده طبعا بعد ما امريكا سحبت بطاريات الباتريوت من عنده وارسلتها لحماية اسرائيل وتركته مكشوف امام كوريا الشمالية ومن خلفها العملاق الصيني!!
= نفس الشئ حصل بالضبط مع رئيسة وزراء اليابان اللى من كام شهر طلعت وهددت بان اى تهديد لتايوان يعتبر تهديد لليابان نفسها وفى زيارتها لواشنطن اكدت انها ستظل اقرب حليف لامريكا ولكنها بعد حرب ايران وسحب بطاريات الدفاع الجوي من كوريا الجنوبية وتايوان … طلعت قالت ان فتح مضيق هرمز ليس اولوية ولا مسئولية اليابان وانها لن تشارك فى اى تحالفات او حروب طالما لم يعتد احد على الأراضي اليابانية!!
= تقرير دويتشه بنك الصادر يوم الثلاثاء توصل الى نتيجة صادمة سانقلها حرفيا “الحرب الدائرة في إيران باتت تشكل اختبارًا حقيقيًا لدور الدولار كعملة أساسية في تجارة النفط العالمية وقد تقود تداعيات الصراع على المدى الطويل إلى تحوّل تدريجي نحو استخدام اليوان الصيني في تسوية المدفوعات النفطية”
= نظام البترودولار ده نتاج اتفاقية امريكية سعوديه ابرمت عام ١٩٧٤ والمفروض انها انتهت سنة ٢٠٢٤ ولم تجدد .. الاتفاقية كانت بتنص على تسعير السعودية النفط بالدولار الأمريكي واستثمار فوائضها في الأصول المقومة به، مقابل ضمانات أمنية أمريكية. ولكن حاليا المشهد تغير تماما .. السعودية بقت بتصدر اغلب نفطها للصين واليابان .. في حين ان امريكا استبدلت النفط الخليجي بالنفط الكندي والنفط الصخري المحلي.
= بدأت الدول الخليجية تجربة استخدام أنظمة مدفوعات غير معتمدة على الدولار زي إم بريدج
= وافقت امريكا على السماح لكوريا الجنوبية ان تشتري النفط الروسي (اللى اصلا امريكا كانت فرضت حظر على بيعه) باليوان الصيني !!! ده مش كلام خالد .. ده اللى قاله في مؤتمر صحفي يوم الخميس اول امبارح يانج كي ووك نائب وزير أمن الطاقة والموارد في وزارة الصناعة والتجارة والطاقة بكوريا الجنوبية.
= رأي كبار المحللين الامريكان نفسهم زي مقالة إيشان ثارور Ishaan Tharoor في الواشنطن بوست او مقالات جيفري ديفركان Jeffrey Dvorkin وغيرهم الكثير … انه بالفعل النظام العالمي اتغير.
= لو وصلت للنقطة دي فى البوست … اتوقع اننا اصبحنا متفقين ان فى نظام جديد اتولد .. طب ايه المفروض اللي احنا نعمله؟ … حتقولي مين “احنا” ؟ حقولك انا اقصد ب”احنا” “مصر” .. وده موضوع البوست القادم ان شاء الله لو كتب لنا عمر.
