يا دنيا معوّجه
ما تبسّطيها حَبّه
و مهدي الطريق
خلينا نمشي فيكي
نستسهل المشاوير
ونعدي كام خطوة
من بوابات التاريخ
بين كل دي الأزمنه
فيه لسه باب مفتوح
زمن الصعود اللي فات
زمن انحسار الجناة
زمن انحدار النفوس
زمن اللي لسه ما جاش
خلينا نوفي الدين
بسعينا في الخير
شايلين طوالي العيش
فوق الرؤوس شايلين
بنجري ع المخاليق
نطعمهم الرحمه
نسقيهم م اليقين
نداوي في المجاريح
م الظلم والتهميش
نعدي دي الأزمه
ما بين ضياع الأمل
و غرسنا في الطين
خلينا لما نعود
نرجع خفاف خالص
نخطي آخر باب
ونفوسنا مرضيّه
تشهد علينا الحواري
حكاياتنا رصف طريق
تلقطها كاميرا الحياة
بعيون عماد شندى
من غير نمش أو زيغ
الصوره أوضح شيء
تاريخ بيحكي ف تاريخ
يمكن تهون ع الغير
و نعديها الأزمات
علشان ما غيرنا يعيش عرض أقل
