لو “عتمت” ..
إياك تأمن للمطر .
وقت الخطر .. لازم تخاف
“آوى إلى” .. “مركب” نجاة
لما الحياة ..
تصبح نتاج .. لسنين عجاف
وإفضل مع الراكبين .. ” آمين ”
ف العتمة تحتاج للبصيرة
مش بصر ..
داحنا من الاخر .. ضعاف ..!!
جوه الطوفان
والريح معاند سكتك
الخوف .. ضرورى يسكتك
لما السما ..
“تفتح” على “روحك” بيبان
والأرض “تغرق” بالغيلان
و”حيتان” بتخطف لقمتك
ياتموتك ..
والموت ماهوش محتاج سبب
يالاالعجب ..!!
الموت حليفك ف الحياة
هو اللى ساند خطوتك
“إقتل” .. “تعيش” ..
ياتموت جبان .. جوه الطوفان ..!!
والشارع “الغرقان” ضجيج
أصبح مزيج .. من عدل تاه
وسكوت مريب
على ظلم بالغ منتهاه
والكل متعلق “بقشاية” نجاة
طمعان يعيش
هى الحياة لو “بل مفيش”
هتكون حياة ..؟!!
لما الطوفان يبلغ مداه
لازم تكون .. قد الحياة
علشان تعيش .. جواك طوفان ..!!
