
دي معجنة و البعد عنها غنيمة
لعب بتلات ورقات ونفس لئيمة
م الصبح حاسس بالقرف والضيق
خرموا الأوزون جاب زفت م البريمة
💖
قبل الجنون بمحطتين يا اسطه
مجنون لوحدي بدون ولا واسطة
وَفّر كروت الشحن للعاقلين
يتجننوا أحسن من الجلطة
💖
نويت ابقى طيّب مُطيع مُستكين
ماليش دعوة مين ويا مين ضد مين
نو يت ابقى طيب ما ازعلش حدّْ
واصلّي واسلّم على أيّْ حدّْ
💖
الليلة خنقة وضيق وما أشبه
وشعور بليد بالزحمة لا يأبه
كل اللي حاصل دا نمر في السيرك
ولكل واحد نمرة ف النصبة
💖