التعليقات على الخبر ساخرة، ومتشككة، وأنا عارف أن حكاية اللوا عبد العاطي – زي م بيقول محمد المتيم – قد أصابت الروح العلمية المصرية في مقتل، وجعلت المصريين يتشككون في قدرات علمائهم، بس أوعى تنسى برضو أن عشرات العلماء والباحثين قد انتقدوا عبد العاطي، منهم من فعل ذلك علنا، ومنهم من تقرّح كبده من القهر والصمت.
—
أنا كمان عارف خيبة الجامعات، وعارف مقدار تراجعها، وعارف أنها مسكونة بأهل الثقة والولاء وبتوع شوبش، وأنها مشغولة بالهمبكة أكتر من انشغالها بالعلم.. وعارف كمان أن التعليم مش مهم أوي عند الدولة، ولو ألغت التيرم كله لن يخسر الطلاب شيئا في عموم مصر…. وعارف وعارف.
—-
انما عايزك كمان تعرف، إن مصر مش دا كله، مصر فيها علماء زهّاد، فيها أكابر على أعلى مستوى، بيشتغلوا بأقل الإمكانات لكنهم بيشتغلوا ويقدروا يحققوا إنجازات، مصر قوية جدا، وكبيرة جدا، وتقدر تنجز ما لم يخطر لك على بال… مصر مش هي الطبقة التي تدير، أو هي الإعلام المشغول بالتطبيل والترويج لأي هبل … مصر مش هي العناوين دي، مصر الحقيقية العظيمة للأسف تقبع في الظل، مصر أم الدنيا ورا دا كله، مصر تقدر وتقدر…
—-
في اليوم الذي سيسود فيه القانون، والمحاسبة والشفافية، وتولية الأكفأ، سترى مصر أخرى، سترى الوجه الحقيقي لهذا الوطن، لن نأخذ غير سنوات قليلة، لتجد وطنًا لا يقل عن ألمانيا وبريطانيا وفرنسا ….!!
