الشاعرة /نادية البسيونى مش فاكرة حاجة
—————- قبل اما تحكم ع الكلام وتقول سذاجة أو تمام مش فاكرة إيه وازاى وكام غير بس قاعدة والسلام مش فاكرة حاجة ف أى حاجة لو حتى كانت فينا عادة مش فاكرة طبع القهوة إيه لو سادة أو سكر زيادة والفرق إيه بين السفينة وكوم حمادة كان حظ مين لما اتولد مكتوب عليه نول الشهادة كان حلم مين لما بحلاوته وهمته راح باع لغيره كوم سعادة مش فاكرة إيه طبع الهوى يمكن يكون طبعه الجفا واحتاج دوا يمكن يكون طبع الوفا مالهوش مكان واحنا سوا كان فين طريقنا اللى مشيناه كان فيه أمان ولا نسيناه كان نور صباحنا يضمنا ولا المسا كان منتهاه ولا الزمن كان له حالات ياكل ويرمينا بأساه مش فاكرة إيه إحساسى بيك إن كنت وياك أو عليك أو تهت فيَّا وتهت فيك لما الأمل مرجح عيونى بين إيديك قلت اشتريك والعطف والشوق والحنان كانوا الشِريك مش فاكرة شىء غير بس واحنا صغيرين قاعدين بنبنى بيت بطين والورد عايىء بالعبير والحلم كان طاير جميل والوعد كان وقت الأصيل زهزه ستايرنا الحرير واحنا وبهجة قربنا قاعدين على كفوف النسيم قعدة صفا مع عمرنا نجمع بإيد واحدة السنين وقلوبنا تتهجى الحنين
