قولتلها بموت ..
رقعت بالصوت ..
مع إن الموت ..
بقى ناس ف بيوت
قايمين … نايمين
واكلين .. شاربين
ومكتف روحهم سحر تاروت
مبقوش طايلين الموت ف تابوت
أو قبر يطبطب ع اللى يفوت ..!!
( المشهد صمت ) ..
دموع وسكوت ..!!
قولتلها بموت ..
وأهى صدمة تفوت
يمكن تتحل ..
أحسن م أتشل ..
أو حاجة تأثر ع ( الكتكوت ) ..!!
ضحكت وبصوت ..
وقالتلى ح أقوم ..
آه يا عيب الشوم ..!!
مالك يا سعيد ..!!؟؟
يابو صبر حديد ..
آل يعنى جد عليها جديد ..!!
ماهو نفس الحال وبقالو سنين
وأدينا عايشين ..!!
قولتلها خلاص مبقاش فيه حيل
والحال لو طال ..
هنشوف الويل ..
وبجد الجد … الحمل تقيل
والضهر خلاص مش حمل الشيل ..!!
مبقتش سيزيف ..
والجى مخيف ..
وبحكم السن .. القلب ضعيف .
قالت يا لطيف ..
بطل تخاريف ..
الجى ف علم الغيب يا خفيف ..
قولتلها بموت … ضحكت وبصوت
وقالتلى إستنى لحد الصيف ..!!
