نفسى أموت فوق فرشتى
ومحدش يشيل همى
نفسى مكونش تقيله على حد
ولا أتعب حد من دمى
دوول جملتين سمعتهم
وياما قالتهم قبل ماتموت
ست الكل المرحومه أمى
اللى من يوم مافارقت دنيتى
وأنا زاد حزنى وزاد همى
راحت اللى كانت صاحبتى
واللى ياما شالت كتير همى
واللى مش قادر على بعدها
هو أنا ليا مين بعد أمى
أمى الله يرحمها ويغفرلها
كان كلامها بسيط
لكن كان بيأثر ف الحديد
وكان معبر …. وعليها
كان بيخوفني ويقلقني
ويخلينى منامش الليل
من خوفى لتبعد عنى
ولوحدى ف دنيتي تسيبني
وأهى ماتت وسابتني
بعد فراقها سنين في الغربة …
وفراقها يمين بالله
تاعبني كتير ومعذبني
الله يرحمها ويغفر لها
شقيت علينا كتير
لحد ما كبرتنا
ولحد ما كانت بتتمني لي
الخير والنجاح ….
وصلتني …وطول عمرها كانت
بتفهم في وبتعلمني
وحاجات كتير علمتهالي
وحكم ونصايح كتير قالتهالي
كان نفسها تعمل مني
حاجه طيبه ….
الناس تحبها
وتحب تشوف مني
كل حاجه طيبه تخليهم
يحترموني ….
ويترحموا عليها وعلى أبويا
اللى ربوني
عالفضيله والمحبه للكل
ومزعلش من حد …
ولا أسمح لحد يزعلني
الله يرحمها علمتني
حاجات كتير لكن حاجه واحده
معلمتهاش ليا
وهى ازاى أأقدر أعيش
دنيتى من غيرها
وهى بعيده عني
الله يرحمك ياحبيبتى
ويغفرلك ويرزقك الجنه
والدرجات العاليه منها
ويصبرني على فراقك
اللى مقطع فيا
ويجعلني
طيب ومحبوب من الكل
وأعمل كل اللى يخلي
ربنا راضى علي
ومش زعلان مني
لما أعمل كل اللى يرضيه
وأأخافه وأأخشاه
وأبعد الشيطان عني وعن اسرتي … يارب
وأأدى الفرايض على أكمل وجه
وأصوم و أصلي
وأعيش ما بين الناس
بالأدب وبالأحترام
وأراعى شعور غيرى
ومزعلش حد مني
ومجيبش سيرة حد
وهو غايب عني
وأكون لغيرى قدوه
زى ما كنتى ياحبيبتى
وانتى عايشه بتتمني لي ..
