شعر زجلي.. بقلم الشاعر: حسن أبو عمشة

أوووف…أوووف…أوووف…

حكيوا عنِّي وقالو صرت ختيار
من وقت لي فقدتك بشبابك
قالوا هاشل من بيتو ليل ونهار
ملبَّك بعيشتو بعد ما سكَّر بابك

خطي ما بيعرفوا من الأخبار
إنِّي بقلبك بعقلك وعا حسابك
آخد من ذكائك وبكتب أشعار
عتابا ميجانا وزجل من كتابك

ما بلومهم ما بيعرفوا الأعذار
فكَّروا رحت متل ما الله جابك
ما بيعرفوا في تخاطر للأفكار
بيني وبينك لو مدفون بترابك

خبرهم قلهم وين فكرك صار
قطع الوطن العربي محرابك
وأشعارك وأفكارك طارت نار
ولَّعِت الفيس لي عا حسابك

من جامعة لأكادمية وبإفتخار
ومجلة ومنتدى صاروا أحبابك
تلات شهور انشهرت بفكر طار
والشهادات مِيْتَيْن منهم نابك

خبرهم إذا بقبرك أخدت التار
من لِّي عيَّرك وبسيرتك جابك
كيف لو بعدك بالدني مختار
كنت وديت القسم عالتاريخ
والقسم التاني منهم بجيابك

✍️حسن أبو عمشة