عيونك لسة وساع…..بقلم علي إبراهيم

على فكره عيونك لسة وساع
رغم الاوجاع
وبشوف احلامي كتير فيهم
ويناموا وقلبي يصحيهم
في الحر رموشك ضليلة
في البرد دموعي تدفيهم
اوجاعي عيونك تشفيهم
وازرع فيهم فل ونعناع
* * *
على فكره عيونك لسة جمال
رغم الإهمال
والصبح أن شافهم طل وقال
فيهم موال
الحرب نزال
والهجر ضلال
والحب حلال
على فكره كمان قلبك طيب
لسة قريب
والبعد ماكانش في يوم أميال
* * *
على فكره الشعر دا مش ليهم
ولا اي كلام راح يضاهيهم
غير بس ازورهم واراعيهم
وإن كانوا نصيبي اسكن فيهم
واتمرمغ واعمل فرش متاع
* * *
على فكرة عيونك همس الليل
للصبح يقوم ويصحى النوم
يبدر افراحه لكل الناس
ويطمن اي حزين محروم
ويقوله خلاص ربك موجود
متشلش هموم
#يا_ضحكتها_كفاية_عياط