مرة كنت بتكلم مع صديقة مقربة ليا وسآلتها سؤال مهم جداً ، تفتكري الست عايزة إيه من الرجل وياترى إيه مواصفات الرجل اللي بتبحث عنه أي ست ؟
ردت من غير ماتفكر :- الست عايزة من الرجل إنه مايبصش بره والرجل اللي بتبحث عنه أي ست هو هو نفس الرجل اللي مابيبصش بره وسكتت
سكت شوية قلت هاتكمل لقيتها برضه لسه ساكته، قولتلها:- ها كملي سمعاكي
هي:- أكمل إيه أنا خلصت كلامي خلاص
أنا حسيت إني إتشليت وإحوليت فجأة وخير اللهم إجعله خير مرارتي كانت هاتفرقع وعيني بيبوظ منها مزيج من نظرات تعجب على إندهاش ومن خلفي تعزف موسيقى تصويرية لصوت صرصور الحقل
إيه ده ؟! دا أنا كان ف دماغي إنها هاتقعدلها مثلا يجي تلات أربع سنين تتكلم !!يعني الراجل عايز من الست عريظة ولستة مواصفات والست كلها طموحاتها وأهدافها من الرجل إنه مايبصش بره طب تيجي إزاي دي ؟؟؟؟؟
وفجأة لقتني بفكرها يمكن بلعت لسانها وجالها الزهايمر ولا حاجة وإقترحت عليها بعض الإجابات النموذجية يمكن لعل وعسى تفتكر :- طيب إيه رآيك يكون وسيم رومانسي وحالم ويجبلك ورد ويدلعك كده ويقولك كلام حلو كتير؟؟
ردت :- أوك هايبقى زي القمر رومانسي وحالم وطيب وروش وكل حاجة وهايبص بره
وأنا مصرة إني أفكرها :- طيب إيه رأيك لما يبقى كريم ويفسحك ويخرجك ويسفرك ويوريكي الدنيا ويديكي فلوس كتير تشتري اللي نفسك فيه؟؟
ردت :- هايخرجني وهايفسحني وهايسفرني وبرضه هايبص بره
أنا في محاولة يائسة لإستعطافها :- طيب إيه رأيك لو جابلك شيبسي وشيكولاته وعصير ومصاصة وكل الحاجات الحلوة اللي بتحبيها؟؟
ردت :- هاطفح كل ده وهو برضه برضه هايبص بره
هو الراجل ده على طول شاطح ومنفد على بره كده؟هو الراجل ده مالوش أهل يسآلوا عنه ولا إيه ؟؟؟
