فاكرين ماما نونا في مسلسل حمادة عزو ؟ .. فاكرين لما ماتت في المسلسل ، احنا كلنا بكينا عليها ازاى ؟ .. بكينا رغم معرفتنا ويقننا ان كريمة مختار عايشة وماتت فقط في التمثيلية ، بس من شدة التوحد بين الناس وبينها ، مقدروش يحوشوا دموعهم وهما بيتفرجوا على حمادة ابنها وبيسمع : كنتي شمعتنا كنتي نور بيتنا .. كنتي سامرنا وانفض سامرنا .
ايه اللي خلاّنا بقى نبكي كده في الحلقة 28 من الاختيار لما مات منسي ورجالته الابطال ؟ لاننا كلنا عارفين انهم ماتوا بجد .. شافوا الويل بجد .. بس كانوا رجالة جد الجد .. كلهم .. من اصغر جندي لحد ” منسي ” قائدهم .. الشهم والجدع والانسان.
…………………
ايه ده .. ايه كمية المتفجرات دي كلها عشان يهاجموا مقر قيادة في سيناء .. ده لو كانوا عايزين يحتلوا القاهرة من شرقها لغربها مكنوش احتاجوا معدات قتالية اكتر من كده .. ايه الغل ده .. ايه السواد ده كله .. وليه ؟ .. طيب منسي وابطاله الرجالة بيدافعوا عن أرض ووطن .. انتوا ” يا ولاد الكلاب ” بتدافعوا عن ايه؟ .. مين ضحك عليكم ياشوية جزم قديمة وقالكم ان ده الاسلام .. ؟ دماغكم اتمسحت ازاى كده ؟ .. والله العظيم قاعد اقلبّها يمين وشمال عشان اشوف سبب واحد يخليكم تعملوا كده .. مش لاقي .. ايه ؟ كل ده عشان معرفتوش تحكموا مصر .. وانتوا تفتكروا بالسواد اللي جواكم والجهل اللي اتربيتوا عليه .. كنا احنا كشعب سيبناكم تحكمونا ، حتى لو الجيش حماكم ؟ .. يبقوا لسه معرفتوش جينات الشعب ده .. معرفتوش احنا عملنا ايه في 56 .. احنا كأفراد معناش سلاح .. كنا بنحارب 3 دول بالطوب وغطيان الحلل وكبشة المكرونة وايد الهون .. عملنا ملحمة يحكي عنها التاريخ .. تفتكروا كنا حنسيبكم تحكمونا وتتحكموا فينا .. ؟ ايه ده .. فين دماغكم .. ممسوحة اوي كده ليه عشان تعملوا في ولادنا ورجالتنا كده ؟ .. عشان في الأخر تقابلوا حور العين ؟! … ولما حور العين تستقبلكم انتم يا ” معفنين ” ، أمال اللي رووا الارض بدمهم ومستسلمش لأخر طلقة ف بندقيته .. مين اللي حياخدهم بالحضن ويشيلهم فوق دماغه وفي عنيه؟!
…………………….
مش احنا بكينا على ولادنا كأننا لسه راجعين من المقابر بعد دفنهم .. بس والله العظيم فرحانين فرحة بيهم .. طوّلوا رقابتنا للسما .. ماتوا ؟ ايوه ماتوا .. بس ايه .. ماتوا رجالة .. قتلتوا كام ؟ 100 – 200 – الف – الفين ؟ .. بس جه بعدهم كام ؟ عدّوا انتوا لو شاطرين في العد .. ولا بس شاطرين في عد الفلوس اللي بتقبضوها نظير خيانتكم للبلد واهل البلد وناسها وترابها .. خليكوا على عماكم كده ، لحد ماتتصفوا واحد ورا التاني ونخلص من نجاستكم!!
……………….
زوجة المنسي
انا شفت صورتك .. بعد الحلقة .. طبعا حزينة ودموعك نزلت تاني .. بس اللي خفّف عنك دموع كل المصريين حسدوكي انك مرات ” المنسي ” .. يابختك بجوزك .. حتعيشي طول عمرك رافعة راسك للسما انك كنتي مرات شهيد ، ومش اى شهيد .. ده رايح للموت وهو بيضحك .. كل مرة كان بيودعك كان عارف انه ممكن ميرجعش تاني .. بس كان عارف انه متجوز ست بمليون راجل .. ماهو مرات البطل لازم تبقى بطلة .. أمال هو كان اتجوزك ليه؟ كان عارف انه ولاده اللي سابهم عهدة عندك حيتربوا احسن تربية .. زحنشوف ” منسي ” تاني .. مش حيموت الا لمّا يجيب حق ابوه.
…………………
ابن المنسي
شفت صورتك وانت لابس لبس الصاعقة .. وبتبوس تعش ابوك الملفوف بعلم مصر .. حسيت انك كبرت عشرين سنة في لحظة .. والبراءة اللي كان مفروض اشوفها في طفل في سنك ، شفت مكانها نظرة فخر واعتزاز .. وكمان تحدّي : ابويا مات .. بس خلّف راجل .. وبكره ولا بعده .. حتلاقوا في وشكم ” منسي ” جديد.
…………………
أمي كانت زمان تقول لي : كل واحد له من اسمه نصيب .. الا انت يا ” منسي ” .. اسمك صحيح ” منسي ” بس عمرنا عمرنا ما حننساك!!
………………….
حاجة اخيرة حاقولكم عليها .. لو تلاحظوا انا متكلمتش عن الممثلين في المسلسل .. اكيد كلهم كانوا رائعين .. لكن الغريب بقى ان من كتر ” غلّي ” من اللي قاموا بدور الارهابيين ، متهيألي لو شفت واحد منهم حاقتله .. وده دليل اتقانهم الرهيب للأدوار وتقمصهم الشديد للشخصيات .. بس برضه ويارب يسامحوني .. لو شفت واحد منهم .. حاقتله!!!
