بقيت درويش…بقلم محمد محمود

أنا هعمل خلاص درويش،
هسيب دقني، وهلبس خيش،
وهجري وأقول:
أنا محتاج بجد أعيش.

سنين العمر سرقاني،
وأحوالي مضيقاني،
وعايش وسط خلاني…
كما الدرويش

بداوي الجرح بسكوتي،
وبتمنى كتير موتي

وبكتب كل يوم عنوان،
وأفكاري كما البركان،
بعاني الوحدة والسجان،
وقلمي سر أحزاني

أنا المظلوم وانا الجاني،
وانا الساكن فـ وجداني

أنا العاشق وانا المعشوق،
أنا المطحون وانا المخنوق

أنا المولود وانا الشايب،
أنا المربوط وانا السايب

بخانق ضحكتي بصوتي،
وحاكم فكري بسكوتي

أنا كاره قيود الخوف،
ومتخفي وانا المعروف

ما بين أبيات بتتألم،
وأبيات تانية تتكلم

أنا جندي بيحمي الحق،
وساكن جوا قلبي الصدق،
وقلمي هو راس مالي

كلامي رصاص، كلامي ورود،
وأشواقي ماليها حدود،
وعايش وسط أحلامي

وبكتب كل يوم غنوة…
تنور كل أيامي

وبتكلم بصوت عالي،
واداري الجرح بكلامي

بنادي عـ الأمل يطرح،
وبتمنى القلوب تفرح

مـ انا ضحكة في ليلة هم،
وانا فرحة فـ وسط الغم

وانا كلمة فـ حلق حزين…
بيتألم

وانا دمعة من الفرحة…
بتتكلم

أنا الإنسان…
فـ أفراحه وأحزانه

أنا الإنسان…
بأشكاله وألوانه

أنا الإنسان،
وبتمنى أكون إنسان..