القصيدة البكر….بقلم مصباح_المهدي

الريح خاصمها الصيف
وصالحتني
على نفسي جوة الفرن
صالحتها
يااصحاب لازمهم كلهم كتالوج
وخريطة منها أعرف الأبعاد
الأسئلة بتنعاد كأنها رد
والقلب ابأس مايكون مرتد
على ذاته حابس دمعته مرتاب
من كل واحد جاب سبب يكره
من كل واحد جاب ذريعة يسب
قلبي أنا ف مهب ريح صرصر
عاتي بيتبعتر على الجمرات
يااصحابي أمة مؤمنين فيا
نافرين ألى مزدلفة من عرفات
حافظين ايات ومرددين دعوات
حافظين مودتكم بلا تعقيد
مين اللي قال قلبي كفر بالحب
قلبي بدستور حب حاكمني
لازمني أحفظ ود أحبابي
وأعد كل الناس محبيني
أمي كأني طفل شب وحيد
لامدرسة ولاأم تاخد أيد
للسلم اللي بيا يطلع فوق
أمي مع العفاريت بربع خراب
بارضع قلق واتنفس المتاهات
واكل فتات الشك والريبة
فينك ياأول كلمتين جوني
على شط نيل ع الفطرة براموني
والمية طالعة الشط بالراحة
والتوتة رامية شعرها فوقي
تحلف مافردت شعرها لغيري
أحلف ماقلتش شعر غير لما
وشمتني شمس بؤونة وادحرجت
جميزة تحكي عن جراح التوت
ياقلبي يامفروط بلح أمهات
ياقلبي ياساكن ف بطن الفرن
ف المحمى عضمي شعلل الجمرات
ف المحمى نادى رغيف على قمرات
دايرين يطفوا نار ماتهداشي
غير لما تبدأ ف القصيدة البكر
دي جراح كأني رضعتها سنتين
ودي هند طلعت ف السما قمرين
ودا قلبي لسة بيستهجى الحب
ودي روحي هامت نجمة ف الوديان
ترضع جنان فكرة بلا ألوان
فكرة كأنها لسة حتى الان
ف المهد تنقل طرفها الوسنان
شكرا لكم
لولا الجراح ماكبرت
شكرالكم لولا الأسى ماحويت
ناسي ف قلبي كأنه أكبر بيت
محتاج لزلزالك وبركانك
محتاج أتوه أكتر واهيم ف الأرض
ف أكتر الوديان غرابة وريب
وارجع كأني غريب عجيب الشان
عطشان كأني من سنين صايم
ونسيته طعم المية ف لساني
ونسيته طعم شفايفك الحلوين
عطشان كأني شعب من مساكين
بيلموا عيشهم من أيدين مساكين
ف القطر تحت الكوبري ف الطرقات
نايمين على لحم البطون قايمين
بيفتوا عيش ف الدمع ويبسملوا
كما كدبة رسمت ف المتاهة طريق
كما كدبة بلت ريق بزيت مغلي
الكدبة تقدر تنزرع لك راس
تقدر كمان تنباس كأنها خد
لو ألف حائط صد راح تحتل
ياصاحبي من كل الجهات راسك
دول حرزوا يأسك وسموه سيف
خلطوا الورق ورموك بما فيهم
والقاضي جهز ورقة الأعدام
المتهم قلبك دخل ف القفص
والجاني نصب نفسه قاضي عليك
لو خربطت تبقى ابتدت تشتي
لو أقلعت يبقى الطوفان بيلم
جثث اللي ماتوا زمان وبيسمي
ناسه اللي لسه حايكنس الطوفان