كتمة بؤنة ف عز برد كياك
شجرة ميلاد الحزن طراحة ..!!
حتى الستارة بتحضن الشباك
وأنا اللى مدعى لقلة الراحة ..!!
عمال أحايل فيك وبستناك
يفرد غيابك ضله ع الساحة ..!!
والليل ..وسومة .. ودقة الساعات ..
والقهوة بتزاحم ف مج الشاى ..!!
دخان سيجارة إتفك حبسه وفات
من بين ضلوعى الشيش يفوت إزاى ..؟!!
وأنا قلبى شهقة بتبلع المسافات
عمالة تسحل روحى .. رايح جاى ..!!
سدرى اللى كمكم بين شهيق وزفير
وحاجات كتير ف القلب مركونة ..!!
وعقاب سجاير مرصوصين طوابير
عامل دماغ بالحزن موزونة ..!!
وجعانى منك لمتك ع الغير
وياريتها كانت صحبة مضمونة ..!!
كان نفسى أفرح بس ليه وإزاى ..؟!!
والحزن كاس سكران وله ناسه ..!!
والليل بارات وحارات وشهقة ناى
كتر المواجع كاتمة أنفاسه ..!!
شاعر بيغفر بس مش نساى
فرفط دموعه قصايد تملى كراسه ..!!
فات المعاد او حتى لسه مافتش
ونس العليل بالآه ياقلبى ملحوقة
جواك إيمان والحب لسه مامتش
كفكف دموعك .. تسنده ف حوجة
وإطوى ف براح الدنيا مايهمكش
دى الناس قلوب .. للجرح مخلوقة ..!!
