لما الكلب يعض الإيد اللي اتمدت له
………………………. بيصبح ديب
واللي بيدخل من باب حاره
………….. غير الهربان م السراديب
جيبك مش عنوان لوجاهتك
……….. أنا أصلاً ماشي بدون جيب
مين يا يمامه قدر يتحرك
…………… لما دخل بحصانه كُليب
هو القبقاب مهما اتطور
………. عمره هيمسك شيخ قباقيب
الكدب ما يصنعش أدارجي
…………. والرقص ما يعملش أديب
دبدوب دبدب ع الدُّبديبه
……………. جمّع كيلو من الدباديب
قال الخايب لابن الخايبه
………. لما اتروّق: سيب وانا اسيب
وقف القزعه على الترابيزه
……….. معاه زماره وقال: بيب بيب
دوشه ومراجيح… بمب بيضرب
………… مولد… واتمرجح يا خطيب
اركب فوق الناس واستركب
…………………. زود أعداد المراكيب
سيدنا الشيخ كان واقف ساكت
……………. من مالطه لحد سرنديب
كلت امبارح كيلو بطاطس
…………. وشوية محشي وجوزطيب
جارنا اتعارك ويّا مراته
………….. لما اختلفوا على الكراكيب
آخر ماتش لكابتن عوكل
………………. أثبت إنه حمار تدريب
قعدوا جماعه ف ضهر بتاعه
……………. والمغلوب لفع المشاريب
اتصورت معاهم سيلفي
……….. شعري وجعني بشكل غريب
لما ظهر شايب في الصوره
……… هل دا طبيعي.. الشعر يشيب؟
أمي قالتي ف ودني بقوه
………………. لو نشنت لا بد تصيب
الخايب مش عايز حاجه
…………. والشاطر ما عاوزش يخيب
والعالم مش محتاج ثوره
……………… ولا لازمه إعادة ترتيب
كل أملنا الدنيا تضلل
…………….. ع الحرّان…. والرزّ يطيب
شد سيفون ع الخونه بإيدك
…………… علشان ريحة الخاين عيب
