اول ما اشوف الورد بفتِكرِك
يمكِن عشان الورد يشبهلِك ،،
ومع إني مفيش
ولا مره ضميتك
لكني بجد حبيتك
وبعيوني ناجيت طيفك ،،
وكفايه ارسمك ورده
بِتهدى العِطر للفراشات
او حتى اكتبِك نِجمه
أنوّر بيها السماوات
ولو هوصف جمال قلبِك
اكيد هكتِب كتير حِكايات
دنا أول ما افكر فيكي
بتعّرق إيدي بالكلمات ،،
ما انتي ليل الحُب في عيونك نهار
وندى عطفك شاقق في القلوب انهار
وشمس حنانك زرعت في الوجود اشجار
وكأنك طِفله م الجنه وشايله م الجمال اسرار
وانا اول ما تيجي في بالي بتوه واحتار ،،
طب تعرفي ؟
قلبي اللي عجز م الجراح
اول ما شافك ابتسم
والزهور زادت جمال
اول ما إسمك اتذكر،،
ويمكن املي مِتشعلق
في طرف الليل بخيط مقطوع
لكني مصمم إني أكون،،
ومش فارق اكون موجوع
ولا فارق معايا ظنون،،
وانا مش ساحِر ولا دجال
ولا عندي كنوز المال
لكن شاري بعُمري الجاي،،
انا شاعر،،
في إيدي الشمال غِنّوه
وف إيدي اليمين احلام
هتتحقق مع الأيام ؛؛
